Dy anije të NATO-s stërvitje në Gjirin e Vlorës

Dy anije të NATO-s dhe tre anije të Forcës Detare Shqiptare po zhvillojnë stërvitjen e përbashkët "Strike 2026" në Gjirin e Vlorës, në zonën detare pranë gadishullit të Karaburunit dhe ishullit të Sazanit. Stërvitja ka nisur të premten dhe pritet të vijojë deri më 19 tetor, me synimin për të përmirësuar koordinimin e operacioneve detare dhe për të forcuar bashkëpunimin mes forcave pjesëmarrëse.

Skenaret e stërvitjes përfshijnë manovra detare dhe angazhimin e forcave ajrore, në kuader të rritjes së ndërvetësimit operacional dhe aftësive të përbashkëta. "Strike 2026" është stërvitja e dytë e këtij lloji që zhvillohet gjatë këtij viti në Gjirin e Vlorës. Ndërkohë, aktivitetet stërvitore pritet të shtrihen edhe në zonat detare të Durrësit dhe Shëngjinit.

Stërvitja vjen në një kohë trazirash për qeverinë Rama, teksa Tirana është kthyer në një sheshbetejë ndërmjet protestuesve dhe policisë. Kryeministri Rama me një gur në dorë nga zyra e tij, refuzoi të jape dorëheqjen. "Janë disa që thonë 'hapi rrugën rinisë'. Cili rini? Kësaj? Kësaj? Le të supozojmë se ia hapë rrugën kësaj, çfarë vjen pas kësaj? Vjen një qeverisje më e mirë? Vjen një Shqipëri evropiane? Pas kësaj vjen e kaluara që ia kemi paguar të gjitha haraçet dhe nuk kam ndërmend ta kthej vendin në të kaluarën", u shpreh Rama.

Kryeministri pranoi se është ai pas vendimit për të nxjerrë RENEA-n në terren duke kërcënuar protestuesit se "rrethi për ta do të shtrihet". "RENIA ka detyrë të dalë në momentin kur ka kërcënim. RENIA del edhe kur ka ndeshje futbolli Shqipëria me Serbinë, çfarë do të thotë kjo? Doli dhe do të dalë. Do të shtrihet rrethi ndaj atyre me maska. E ka edhe ligji që ti nuk mund ta fshehësh identitetin", tha Rama.