Futbollistët e kombëtares kundër dhunës policore

Futbollistët e kombëtares shqiptare, Rey Manaj dhe Myrto Uzuni, kanë reaguar publikisht për protestat e studentëve në Tiranë dhe raportimet për dhunën e ushtruar nga forcat e policisë ndaj protestuesve. Përmes mesazheve të publikuar në rrjetet sociale, dy sulmuesit kuqezinj kanë shprehur shqetësimin për ngjarjet e fundit, duke theksuar rëndësinë e respektimit të të drejtave të studentëve dhe të qytetarëve që protestojnë. Rey Manaj ka kërkuar që institucionet të dëgjojnë shqetësimet e të rinjve, të cilët kërkojnë kushte më të mira dhe mundësi për të ndërtuar të ardhmen e tyre në Shqipëri. "Dua të shpreh shqetësimin tim për dhunën ndaj studentëve dhe protestuesve. Studentët janë fëmijët tanë, janë e ardhmja e kombit dhe meritojnë të dëgjohen... Askush nuk duhet të ushtrojë dhunë ndaj tyre, aq më pak ata që kanë për detyrë të mbrojnë qytetarët," shkruan Manaj. Krahas mbështetjes për studentët, sulmuesi shqiptar ka bërë thirrje që protestat të zhvillohen në mënyrë paqësore, duke kërkuar shmangien e çdo veprimi që mund të shkaktojë dëmtimin e pronës publike apo private. Në mbështetje të protestuesve ka reaguar edhe Myrto Uzuni, i cili e ka lidhur mesazhin e tij me përgjegjësinë që mbart përfaqësimi i vendit përmes uniformës. Sulmuesi kuqezi ka theksuar se edhe punonjësit e policisë duhet ta ushtrojnë detyren me përgjegjësi dhe respekt ndaj qytetarëve. "Si sportist, kam përjetuar krenarinë që të jep përfaqësimi i vendit tënd. Besoj se edhe uniforma e policisë duhet të mbahet me atë ndjenjë përgjegjësie... Dhuna ndaj qytetarëve që protestojnë është e papranueshme. Qytetarët meritojnë të dëgjohen dhe të ndihen të mbrojtur," shprehet Uzuni. Ai ka kërkuar gjithashtu që veprimet e individëve të caktuar të mos cenojnë imazhin e të gjithë strukturës së Policisë së Shqipërisë, duke nën-vizuar rëndësinë e respektimit të uniformës dhe përgjegjësive që ajo përfaqëson. Reagimet e Manajt dhe Uzunit kanë tërhequr vëmendje në rrjetet sociale, ku mesazhet e tyre janë shpërndarë dhe komentuar nga përdorues shumë. Dy futbollistët janë bashkuar kështu debatit publik mbi protestat e studentëve, duke kërkuar respektimin e të drejtës për të protestuar dhe shmangien e dhunës gjatë tubimeve.