U kap me katër armë dhe municion në automjet, arrestohet 40-vjeçari në Vlorë

Një 40-vjeçar është arrestuar nga policia në Vlorë, pasi u kap duke qarkulluar me automjet me armë dhe municion pa leje. Specialistët për Hetimin e Krimeve të Stacionit të Policisë Selenicë, në bazë të informacioneve të siguruara në rrugë operative, ndaluan për kontroll një automjet në vendin e quajtur "Ura e Vodicës". Në automjet ndodheshin shtetasit Sh. B., 40 vjeç, dhe F. B., 38 vjeç, të dy banues në fshatin Mavrovë. Gjatë kontrollit, efektivët gjetën dhe sekuestruan një pushkë me pajisje optike të montuar, tri armë gjahu dhe 16 fishekë gjahu. Pas veprimeve hetimore, 40-vjeçari Sh. B. u arrestua në flagrancë, ndërsa ndaj 38-vjeçarit F. B. nisi procedimi penal në gjendje të lirë, pasi njëra prej armëve të gjahut të sekuestruar i përkiste atij. Armët dhe municioni u sekuestruan në cilësinë e provës materiale, ndërsa materialet procedurale iu referuan Prokurorisë së Vlorës për veprime të mëtejshme. Policia bën të ditur se kontrollet vijojnë për evidentimin dhe parandalimin e veprimtarive të paligjshme, si dhe garantimin e sigurisë publike.