Mjekët shqiptarë në Gjermani: Shqipëria ka nevojë për një Evropë që sheh

Mjekët dhe profesionistët shëndetësorë shqiptarë që jetojnë dhe punojnë në Gjermani kanë nisur një peticion drejtuar Bundestagut gjerman dhe deputetëve gjermanë në Parlamentin Evropian. Përmes një letre, mjekët shqiptarë në Gjermani shprehin shqetësimin për protestat që, sipas tyre, prej më shumë se katër muajsh po zhvillohen në Tiranë dhe në qytete të tjera të vendit. Ata ngrenë shqetësimin për raportimet e organizatave të të drejtave të njeriut lidhur me përdorimin e forcës dhe hedhjen e gazi lotsjellës pa paralajmërim. Sipas tyre, edhe Delegacioni i Bashkimit Evropian në Tiranë ka kërkuar hetim të shpejtë për këto pretendime. Një tjetër çështje që ngrenë shqetësim të profesionistëve shëndetësorë janë raportimet për automjetet që perceptohen si ambulanca dhe që dyshohet se janë përdorur në mbështetje të operacioneve policore. Si mjekë, e dimë se çfarë dëmtimesh shkakton gazi lotsjellës, sidomos te fëmijët, të moshuarit dhe të sëmurët kronikë. Ambulancat dhe personeli mjekësor duhet të shërbejnë vetëm për kujdesin ndaj të lënduarve, kurrë si pjesë e operacioneve policore. Për këto arsye, ju kërkojmë: 1. Të mbani një qëndrim publik në mbrojtje të të drejtave për protestat paqësore në Shqipëri. 2. T'u kërkojini autoritetëve shqiptarë një hetim të pavarur dhe transparent për përdorimin joproporcional të forcës dhe për rastet që përfshijnë automjetet mjekësore. 3. Të kërkojini garanci për kujdes mjekësor të paanshem ndaj të gjithë të lënduarve dhe mbrojtje për personelin mjekësor dhe gazetarët. 4. Ta vendosni këto çështje në axhendën e procesit të anëtarësimit të Shqipërisë në BE, veçanërisht te kapitujt për shtetin e të drejtave dhe të drejtat themelore. 5. Të përdorni të gjitha mjetet diplomatike në dispozicion për të parandaluar një përshkallëzim të mëtejshëm. Shumë prej nesh janë shtetas gjermanë dhe kontribuojnë çdo ditë në sistem shëndetësor të Gjermanisë. Prindërit, vëllezërit, motrat dhe të afërmët tanë jetojnë në Shqipëri. Ajo që ndodh atje nuk është për ne një çështje të largët politike, por prek drejtpërdrejt familjet tonë. Evropa nuk mund ta mbrojë demokracinë vetëm përmes fjalimeve solemne. Vlerat evropiane nuk duhet të ndalen në kufijtë e Bashkimit Evropian. Shqipëria ka nevojë për një Evropë që sheh, dëgjon dhe kërkon përgjegjësi. Jo dikur, por tani. Me konsiderata të lartë, Mjekët dhe profesionistët shëndetësorë shqiptarë në Gjermani.