RENEA ndërhyri pas telefonate në sallën operative, rrezikohej jeta e efektivëve

Policia e Shtetit ka sqaruar praninë e forcave speciale RENEA para Kryeministrisë mbrëmjen e së shtunës. Drejtues Albert Nushi, shefi i Sektorit të Drejtimit në Departamentin e Sigurisë Publike, deklaroi se dislokimi i tyre erdhi pas një telefonate në sallën operative të Policisë së Tiranës, sipas së cilës, mes protestuesve kishte persona të armatosur dhe po qëllohej me armë zjarri.

Në një konferencë për të mediat, Nushi tha se Policia e Shtetit mori masa shtesë për të mbrojtur jetën e punonjësve të Policisë në terren, të cilët janë të paarmatosur. Ai deklaroi se përveç sulmeve me lëndë piroteknike, protestuesit po qëllojnë me armë zjarri dhe kanë vënë zjarrin në hyrjen e godinës së Gjykatës së Lartë.

Nushi deklaroi se Policia e Shtetit është në mbështetje të së drejtës kushtetuese për të protestuar dhe për t’u tubuar në mënyrë paqësore. Ai u bëri thirrje prindërve që të mos lejojnë pjesëmarrjen e fëmijëve të tyre në protesta, pasi jeta e tyre është e rrezikuar.

Gjatë ditës së djeshme, nga sulmet ndaj punonjësve të Policisë në Tiranë janë plagosur 37 punonjës policie. Policia e Shtetit u bën thirrje pjesëmarrësve në protesta që të distancohen nga dhuna dhe personat e maskuar, si dhe të ushtrojnë të drejtën e tyre kushtetuese për tubim në mënyrë paqësore.