Arben Malaj: Edi Rama nuk do të japë dorëheqjen me vullnetin e tij

Ish-ministri i Partisë Socialiste, Arben Malaj, deklaroi se Edi Rama nuk do të japë dorëheqjen me vullnetin e tij, pasi sipas tij, kryeministri nuk do të japë dorëheqjen nëse brenda partisë nuk i heqin shumicën e 83 mandate. Malaj deklaroi se përgjegjësia kryesore politike për situatën aktuale bie mbi vetë Partinë Socialiste.

Sipas ish-ministrit, partia është drejtuar për 14 vite me mentalitetin e një ndërmarrjeje me vetëm një pronar, duke iu referuar kryetarit të saj. "Unë besoj se Rama nuk ka për ta dhënë dorëheqjen, në qoftë se brenda PS-së, nuk ia heqim shumicën abuzuese që kanë 83, po ta lënëm me 63, që mos miratojmë më asnjë ligj dhe të shkojmë në një marrëveshje. Nuk është turp të jepesh dorëheqjen. Kanë dhënë burra shteti në botë për gjëra shumë të vogla. Përgjegjësia e madhe politike është brenda PS-së, e cila në 14 vite është drejtuar me mentalitetin e një ndërmarrje me përgjegjësi të kufizuar, që ka një pronar të vetëm, i cili është kryetari i partisë. Rama gjithmonë thotë kam forcen e kartonit. Kartoni nuk të jepet thjesht për të rritur pushtetin tënd absolut deri në mbretërinë kryeministrore, por të bësh reforma strukturore, që të bën Shqipërinë vend të jetueshem", tha Malaj i ftuar në emisionin "Ditari i Fundjavës".

Me një gur në dorë nga zyra e tij, Edi Rama tha se nuk ka ndërmend të japë dorëheqjen. "Janë disa që thonë 'hapi rrugën rinisë'. Cilës rini? Kësaj? Kësaj? Le të supozojmë se ia hapëm rrugën kësaj, çfarë vjen pas kësaj? Vjen një qeverisje me të mri? Vjen një Shqipëri europiane? Pas kësaj vjen e kaluara që ia kemi paguar të gjitha haraçet dhe nuk kam ndërmend ta kthej vendin në të kaluarën", u shpreh Rama. Kryeministri pranoi se është ai pas vendimit për të nxjerrë RENEA-n në terren duke kërcënuar protestuesit se "rrethi për ta do të shtrëngohet". "Renea ka detyrë të dalë në momentin kur ka kërcënim. Renea del edhe kur ka ndeshje futbolli Shqipëria me Serbinë, çfarë do të thotë kjo? Doli dhe do të dalë. Do të shtrëngohet rrethi ndaj atyre me maska. E ka edhe ligji që ti nuk mund ta fshehësh identitetin", e mbylli Rama me këtë kërcënim fjalën e tij.