Lumë protestuesish në rrugët e Tiranës, turma ndahet në disa grupe
Protestuesit kanë mbushur rrugët e Tiranës për të shprehur kundërshtimin e tyre ndaj qeverisë dhe sistemit politik.
Një numër i madh qytetarësh ka mbushur rrugët e Tiranës këtë të diel, në ditën e gjashtë të protestave kundër qeverisë dhe sistemit politik. Protestuesit fillimisht u grumbulluan pranë Ministrisë së Arsimit, ku pati tensione dhe ndërhyrje të policisë për shpërndarjen e tyre. Në këtë zonë u regjistruan edhe arrestime, ndërsa më pas turma u zhvendos drejt 9-katëshve.
Marshimi vijoi në pjesën e pasme të Muzeut Historik Kombëtar, me protestuesit që po përshkonin rrugët e qendrës së kryeqytetit. Ndërkohe, gjatë lëvizjes së turmës janë djegur kosha mbeturinash në rrugë dhe në disa prej kryqëzimeve kryesore të Tiranës.
Pjesëmarrja e protestuesve është e konsiderueshme, ndërsa marshimi vijon në disa akse të qendrës së qytetit. Dita e gjashtë e protestave po shoqërohet kështu me grumbullime të medha qytetarësh, tensione me policinë dhe incidente në rrugët e kryeqytetit.