Gvozdenovic largohet nga Elbasani, dorëheqja pas humbjes me Skënderbeun

Trajneri serb Ivan Gvozdenovic nuk do të vazhdojë më në stolin e Elbasanit. Ai ka vendosur të japë dorëheqjen pas humbjes 2-1 ndaj Skënderbeut, në një moment kur rezultatet e skuadrës verdheblu nuk kanë qenë në nivelin e pritshmërive.

Vendimin e Gvozdenovic e ka komunikuar Top Channel, duke konfirmuar se trajneri serb do të largohet nga drejtimi i skuadrës. “Unë jap dorëheqjen tani, do të presim pak dhe pastaj flasim”, është shprehur trajneri në mesazhin e dërguar televizionit.

Humbja me Skënderbeun duket se ka qenë momenti vendimtar për teknikun, i cili nuk ka arritur të gjejë vazhdimësinë e rezultateve pozitive në këto fillim të sezonit. Elbasani ka regjistruar vetëm një fitore në shtatë javët e para të kampionatit, duke mbetur larg objektivave të klubit.

Gvozdenovic ishte në krye të Elbasanit që prej dhjetorit 2024 dhe gjatë kësaj periudhe drejtoi skuadrën edhe në gjysmëfinalet e Kupës së Shqipërisë në sezonin 2024-2025.

Tashmë pritet të shihet se si do të veprojë klubi verdheblu dhe kush do të marrë drejtimin e skuadrës në vazhdim të kampionatit.