Tensione të forta në qendër të Tiranës, policia sulmon me gaz lotshelles protestuesit pranë Ministrisë së Brendshme

Përplasjet të ashpra po zhvillohen përpara Ministrisë së Brendshme në Tiranë, ku policia ka ndërhyrë me gaz lotshelles kundër protestuesve, ndërsa demonstruesit po hedhin koktej Molotov, mjete tymuese dhe gurë në drejtim të forcave të rendit.

Situata është tensionuar ndjeshëm në këto pjesë të kryeqytetit, ku përballja mes protestuesve dhe efektivëve ka vijuar pas rikthimit të turmës në Bulevardin "Deshmoret e Kombit".

Policia po përdor gaz lotshelles për të larguar demonstruesit nga zona përpara Ministrisë së Brendshme. Nga ana tjetër, hedhja e molotoveve, tymueseve dhe gurëve ka përshkallëzuar përplasjet.

Konfrontimi vjen pas disa orësh ndjekjeje të protestuesve nëpër rrugët dhe lagjet e Tiranës. Forcat e rendit i shtynë demonstruesit nga bulevardi drejt Muzeut Historik Kombëtar, më pas drejt Bulevardit "Zogu i Parë" dhe Unazës, ku një pjesë e turmës marshoi në drejtim të Zogut të Zi.

Megjithatë, një numër i madh qytetarësh u rikthyen në qendër, duke u grumbulluar pranë hyrjes së Pedonales dhe Parkut Rinia. Pas këtij rigrumbullimi, tensionet u përqendruan përpara Ministrisë së Brendshme.

Më herët gjatë ditës, policia përdori edhe tre automjete ujëhedhëse për të shpërndarë demonstruesit. Përplasjet u shoqëruan me hedhje gurësh, fishekzjarësh dhe rrokullisje të blloqeve të betonit në drejtim të efektivëve.

Protesta kundër qeverisë së Edi Rama ka hyrë në ditën e gjashtë të përplasjeve, ndërsa demonstruesit vijojnë të kërkojnë dorëheqjen e kryeministrit.

Përpara Ministrisë së Brendshme, policia po vijon ndërhyrjen me gaz lotshelles, ndërsa protestuesit po përballen me forcat e rendit duke hedhur molotove, tymuese dhe gurë.