Tedi Blushi: News24 qëndron me kurajë dhe dinjitet në anën e të vërtetës

Sekretari i Përgjithshëm i Partisë së Lirisë, Tedi Blushi, ka reaguar pas sulmeve të kryeministrit Edi Rama ndaj News24. Ai ka shprehur mbështetjen e tij për televizionin dhe stafin e tij, duke dënuar presionet ndaj medias së lirë. Blushi thekson se News24 vijon të qëndrojë në anën e lirisë dhe të së vërtetës, pavarësisht dhunës dhe presioneve të vazhdueshme nga pushteti.

Blushi rendit një sërë ngjarjesh që, sipas tij, kanë synuar të godasin televizionin, nga tritoli, dhuna dhe kërcënimet ndaj gazetarëve, te gjobat arbitrare të tatimeve dhe uzurpimi i godinës. Ai shprehet se asnjë prej këtyre akteve nuk e ka shuar zërin e televizionit dhe nuk do të arrijë ta bëjë këtë.

Sekretari i Përgjithshëm i PL-së nënvizon se liria e medias nuk mund të mposhtet me dhunë dhe se e vërteta nuk mund të heshtet përmes presionit. Ai vlerëson gjithashtu qëndresën e gazetarëve dhe të gjithë stafit të News24, të cilët, pavarësisht vështirësive, vijojnë të mbrojnë fjalën e lirë dhe të drejtën e qytetarëve për t’u informuar.

Blushi deklaroi se News24 është një media që nuk përkulet përballë joshjeve apo dhunës së pushtetit dhe është një garanci për triumfin e LIRISË.