Drejtori i Policisë: Sulmi ndaj Komisariatit Nr. 3 është një akt i dhunës dhe nuk mund të justifikohet

Drejtori i Policisë së Shqipërisë, Skender Hita, ka deklaruar se sulmi ndaj Komisariatit Nr. 3 në Tiranë është një akt i dhunës dhe nuk mund të justifikohet. Ai ka theksuar se 10 punonjës të Policisë mbetën plagosur pas përdorimit të bombave molotov, lende piroteknike, gurëve dhe sendeve të forta.

"Sulmi ndaj një komisariati policie nuk është protestë. Goditja e punonjësve të Policisë me bomba molotov dhe mjete të tjera të rrezikshme është dhunë e rendë, e cila dënohet nga ligji dhe nuk mund të justifikohet në asnjë rrethanë", deklaroi Hita.

Drejtori i Policisë ka theksuar se edhe gjatë ditëve të sotme janë regjistruar sulme të tjera ndaj punonjësve të Policisë, me përdorimin e gurëve, lendeve piroteknike, sferave metalike dhe bombave molotov, duke shkaktuar plagosjen e disa punonjësve të tjerë. Prej gjashtë ditësh, punonjësit e Policisë së Shqipërisë po përballen me akte të përsëritura dhune, ndërkohë që vijojnë të përmbushin detyrën e tyre për garantimin e rendit dhe sigurisë publike.

Hita ka paralajmëruar se policia po punon për identifikimin e personave të përfshirë në këto ngjarje, dokumentimin e veprimeve të tyre dhe referimin e provave pranë organave të drejtësisë. "Çdo person për të cilin provohet përgjegjësia penale do të përballë me pasojat që parashikon ligji", u shpreh ai.

Kreu i Policisë së Shqipërisë ka nenvizoi se e drejta për të protestuar në mënyrë paqësore është e garantuar me Kushtetutën dhe se policia ka detyrimin ta mbrojë atë. Megjithatë, ai theksoi se kjo e drejtë nuk mund të përdoret për të justifikuar sulmet ndaj efektivëve apo dëmtimin e pronës publike dhe private.

Hita ka bërë thirrje për qytetarët që marrin pjesë në protesta paqësore të distancohen nga personat që përdorin dhunën. "Policia e Shqipërisë nuk është kundërshtare e qytetarëve. Ajo është në shërbim të tyre. Nuk duhet dhe nuk mund të krijohet një klimë armiqësie ndërmjet qytetarëve dhe punonjësve të Policisë", deklaroi Hita.