Berisha: Mobilizim kombëtar për mbështetje të revoltës studentore

Kryetari i Partisë Demokratike, Sali Berisha, ka bërë thirrje për mobilizim kombëtar në mbështetje të protestës studentore në Tiranë. Në një mesazh drejtuar drejtuesve politikë të qarqeve, deputetëve, kryetarëve të degëve dhe anëtarëve të PD-së, Berisha u ndal edhe te zhvillimet e sotme, duke pretenduar se protestuesit refuzuan të sulmonin selinë e Partisë Demokratike.

Sipas tij, skenari për të shmangur sulmet ndaj Kryeministrisë dhe për t’i zhvendosur ato drejt selive të PD-së dhe Partisë Socialiste dështoi. Berisha e cilësoi këtë si një përpjekje të regjimit për të drejtuar revoltën kundër opozitës.

Berisha ka thirrur të gjithë anëtarët e Partisë Demokratike të mbështesin revoltën studentore dhe të marrin pjesë në protestat e nesërme. Ai ka thënë se mottoja e ditës së nesërme duhet të jetë solidaritet: solidaritet kombëtar me revoltën studentore në Tiranë.