Berisha: Sot është më aktual se kurrë roli armiqësor i Skapit të Partisë Socialiste kundër votës së lirë të shqiptarëve

Sot është më aktual se kurrë roli armiqësor i Skapit të Partisë Socialiste kundër votës së lirë të shqiptarëve. Kjo organizatë është mburoja e krimeve të shumta të shkeljes së ligjit të zgjedhjeve, duke përfshirë krime të shkeljes së ligjit të zgjedhjeve, padëgjuarja e ndonjëherë dhe falja e gjobave dhe kamatave për qytetarët. Për këtë organizatë, ligji i vendit dhe ligji ndërkombëtar për zgjedhjet nuk ekziston. Për këtë organizatë, 54 dosje të dorëzuara vetëm për zgjedhjet e fundit janë konservuar turshi dhe i janë dhënë Partisë së Krimit. Për këtë organizatë, organizimi nga narkoqeveria i 4530 aktiviteteve jashtë afatit ligjor për të ndikuar tek qytetarët në votën e tyre nuk përbën shkelje ligjore. Për këtë organizatë, patronazhistët, këta terroristë politikë që mbledhin letërnjoftimet, që firmosin leje ndërtimi, firmosin certifikata pronësie, që bëjnë kërçenime monstruoze në shkëmbim të votave, nuk kryejnë krime por zbatojnë porositë e Padrinos. Për këtë organizatë, falja e 2.1 miliardë euro gjoba dhe kamata 2 ditë para votimit nuk janë krim, por janë dhurata e Partisë së Krimit, partia e tyre për qytetarët. Për këtë organizatë, firmosja e 138 licencave për mbjelljen e 29 mijë hektarë kanabis ndërkohë që ligji lejon vetëm 200, kanabis për votë, nuk janë krime sepse akte të Padrinos së tyre. Për këtë organizatë, mobilizimi i kartelave të drogës, Çelajve, Troplinëve, Hakmarrjes për Drejtësi, etj, në fushatë elektoralë, për deputetët e Kodrës së Kuajve etj, nuk janë krime, por janë ndihmë për partinë e tyre. Për këtë organizatë, konstatimet e vëzhguesve ndërkombëtarë se në Shqipëri krimi i organizuar nuk lejon rotacionin politik, dhe renditja e qarqeve ku krimi i organizuar ndikoi rezultatet, nuk përbën krim, por ndihmë për Partinë e Krimit. Për këtë organizatë, armike të pluralizmit politik, asnjë parim, asnjë ligj, nuk vlen para fitores dhe rrëmbimit të mandatit nga Padrino i tyre, tha Berisha.