Rama akuzon Rusinë dhe Iranin për protestat, premton shpërblime për policët dhe ndëshkime për studentët

Kryeministri Edi Rama ashpërsoi të hënën retorikën kundër protestuesve që kërkojnë dorëheqjen e tij, duke i lidhur trazirat e ditëve të fundit me ndikimin e Rusisë, Iranit dhe lëvizjeve të ekstremit të majtë. Ai i mbështet policinë dhe pretendon se protestuesit janë të ndikuar nga një ideologji ekstremiste që synon përmbysjen e rendit ekzistues. Rama premtoi një shpërblim të menjëhershëm prej 2,500 eurosh për çdo efektiv të angazhuar në përballimin e protestave, si dhe rritje të konsiderueshme të pagave duke filluar nga janari i vitit të ardhshëm. Ai paralajmëroi gjithashtu pasoja financiare dhe administrative për protestuesit, duke deklaruar se familjet e të miturve do të detyrohen të paguajnë dëmet e shkaktuara gjatë protestave. Studentët që kanë ushtruar dhunë ndaj policisë do të humbasin bursat, mbështetjen financiare dhe përfitimet nga arsimi falas. Rama sulmoi gjithashtu mediat kritike ndaj qeverisë dhe akuzoi Partinën Demokratike dhe komentatorë politikë se po nxisin përshkallëzimin e dhunës. Megjithatë, ai përsëriti se është i gatshëm për dialog me protestuesit paqësorë, por përjashtoi mundësinë e një marrëveshjeje që do të përfshinte dorëheqjen e tij ose ndryshimin e qeverisë.