Parlamenti Evropian: Shqetësim për përdorimin e tepruar të forcës policore dhe dhunën ndaj pronës publike dhe private

Parlamenti Evropian ka reaguar përmes një deklarate të përbashkët lidhur me protestat e fundit në Shqipëri, duke shprehur shqetësim për përshkallëzimin e dhunës, sulmet ndaj institucioneve dhe raportimet për përdorim të tepruar të forcës nga policia. Kryetari i Delegacionit për Marrëdhëniet me Shqipërinë, Marco Tarquinio, dhe Raportuesi i Përhershëm për Shqipërinë, Andreas Schieder, u kanë bërë thirrje protestuesve dhe autoriteteve të tregojnë vetëpërmbajtje, ndërsa kanë kërkuar dialog konstruktiv për zgjidhjen e pakënaqësive.

Në deklaratë, eurodeputetët theksojnë se respektimi i shtetit të së drejtës mbetet kusht thelbësor për përparimin e Shqipërisë drejt anëtarësimit në Bashkimin Evropian. Ata kanë deklaruar se dënojnë përshkallëzimin e dhunës dhe sulmet ndaj institucioneve dhe kanë bërë thirrje autoriteteve të tregojnë vetëpërmbajtje dhe të kërkojnë dialog konstruktiv për zgjidhjen e pakënaqësive.

Eurodeputetët kanë theksuar se e drejta për lirinë e tubimit paqësor dhe të shprehjes mbrohet si nga Karta e të Drejtave Themelore të Bashkimit Evropian, ashtu edhe nga Konventa Evropiane për të Drejtat e Njeriut. Ata kanë bërë thirrje autoriteteve të mbrojnë ushtrimin e së drejtës së lirisë së tubimit, përfshirë protestat paqësore.

Në fund, eurodeputetët kanë bërë thirrje për një dialog paqësor, konstruktiv dhe të sinqertë ndërmjet të gjithë aktorëve, me synimin për të gjetur një zgjidhje kuptimplotë për adresimin e çdo pakënaqësie të shprehur nga protestuesit, në përputhje me ligjet shqiptare dhe standardet evropiane.