Policia njofton kërcënime për vendosjen e lëndëve shpërthyese në disa institucione

Policia e Shtetit ka dalë me një njoftim zyrtar lidhur me një email për lëndë shpërthyese të dërguar disa institucioneve në vend. Sipas njoftimit të policisë, mesazhi elektronik përmbante kërcënime për vendosjen e lëndëve eksplozive dhe kryerjen e akteve terroriste. Nga verifikimet e para teknike, ka rezultuar se email-i është nisur nga një adresë e një institucioni arsimor në Arabinë Saudite.

Ndërkohë, strukturat e specializuara po ndjekin nga afër rastin për të përcaktuar autorësinë dhe origjinën e këtij kërcënimi. Policia e Shtetit informon se ditën e sotme është evidentuar një mesazh elektronik (email), i dërguar në disa adresa institucionesh, i cili përmban kërcënime për vendosjen e lëndëve shpërthyese dhe kryerjen e akteve terroriste.

Nga verifikimet paraprake rezulton se mesazhi është dërguar nga një adresë elektronike që i përket një institucioni arsimor në Arabinë Saudite. Mënyra e dërgimit të këtij mesazhi paraqet ngjashmëri me raste të mëparshme, kur mesazhe të ngjashme kërcënuese janë dërguar nga adresa elektronike të komprometuara, që u përkisnin studentëve të institucioneve arsimore jashtë vendit.

Strukturat e Policisë së Shtetit po kryejnë verifikimet dhe veprimet e nevojshme hetimore për të përcaktuar origjinën dhe autenticitetin e mesazhit, për të zbardhur plotësisht rrethanat e rastit, si dhe për të identifikuar personat përgjegjës për dërgimin e tij.