Deputetja Koçeku i kërkon faktorit ndërkombëtar të reagojë për dhunën policore

Deputetja Marjana Koçeku ka kërkuar faktorit ndërkombëtar të reagojë për dhunën policore ndaj protestuesve dhe për ndërhyrjet e personave me veshje civile në Shqipëri. Ajo ka drejtuar një letër hapur përfaqësive diplomatike dhe institucioneve ndërkombëtare në Shqipëri, duke ngre shqetësimin për dhunën e rëndë policore ndaj protestuesve, veçanërisht të miturve, ndalimet arbitrare dhe ndërhyrjet e personave me veshje civile, pa identifikim policor, gjatë protestave të fundit në të gjithë Shqipërinë.

Deputetja Koçeku ka qenë personalisht e pranishme në protesta dhe ka parë vendosmërinë e të rinjve shqiptarë për ndryshim, llogaridhënie dhe një të ardhme më të mirë. Ajo ka konstatuar se veprimet e forcave të rendit kanë ngritur pikëpyetje të rënda për mbrojtjen e të drejtave të tyre themelore.

Koçeku ka konsideruar si alarmante dhunën ndaj të miturve dhe ka kërkuar hetimin e ndërhyrjeve të personave me veshje civile dhe pa shenja të dukshme identifikimi policor. Ajo ka kërkuar që autoritetet të sqarojnë identitetin dhe statusin e këtyre personave, kompetencat që kanë pasur, bazën ligjore të ndërhyrjeve, zinxhirin e komandimit dhe vendin ku janë mbajtur personat e privuar nga liria.

Deputetja ka ngre pikëpyetje edhe për planifikimin, drejtimin dhe mbikëqyrjen e operacioneve policore dhe ka kërkuar që hetimi të mos kufizohet vetëm te përgjegjësia individuale e efektivëve, por të shqyrtojë edhe udhëzimet e dhëna, rrethanat në të cilat është përdorur forca dhe përgjegjësinë e drejtuesve të operacioneve.

Koçeku ka theksuar se liria e shprehjes dhe e tubimit paqësor janë të garantuara nga Kushtetuta dhe Konventa Evropiane për të Drejtat e Njeriut, ndërsa përdorimi i forcës duhet të respektojë parimet e ligjshmërisë, domosdoshmërisë dhe proporcionalitetit. Ajo ka kërkuar misioneve ndërkombëtare të dënojnë publikisht dhunën ndaj protestuesve, të kërkojnë hetime të menjëhershme, të pavarura dhe të paanshme për dhunën, keqtrajtimet dhe ndalimet e paligjshme, si dhe një shqyrtim të pavarur të ndërhyrjeve të personave civilë.