Kuvendi i Kosovës: Të dëgjohen studentët, dhuna të ndalet nga të dyja palët

Kryetari i Kuvendit të Kosovës, Albulena Haxhiu, ka thënë se institucionet shqiptare kanë përgjegjësinë të trajtojnë kërkesat e studentëve, pavarësisht nëse ato lidhen me zhvillimet e fundit apo me probleme të mbartura prej viteve. Ajo ka theksuar se është shumë e rëndësishme që kërkesat e protestuesve të dëgjohen nga institucionet dhe se secili prej drejtuesve të institucioneve atje, Kuvendi, Qeveria dhe Presidenca e ka për obligim që të trajtojë kërkesat e studentëve.

Haxhiu ka kërkuar që si protestuesit, ashtu edhe forcat e policisë, të shmangin përdorimin e dhunës. Ajo ka theksuar se autoritetet duhet të përgjigjen protestave me maturi dhe dialog, pasi një qëndrim arrogant ndaj kërkesave të qytetarëve mund të shtojë tensionet.

Haxhiu ka komentuar edhe për përfshirjen e mundshme të qytetarëve nga Kosova në protestat që po zhvillohen në Shqipëri. Ajo ka sqaruar se Lëvizja Vetëvendosje nuk ka bërë asnjë thirrje për pjesëmarrje në këto tubime dhe se një veprim i tillë nuk është në përgjegjësinë e saj. Haxhiu ka shtuar se partia e saj nuk mund të mbajë përgjegjësi për vendimet individuale të qytetarëve nga Kosova që mund të marrin pjesë në protesta, duke theksuar se Lëvizja Vetëvendosje gëzon mbështetje të gjerë.