Fati i finales Marok-Senegal në duart e CAS-it, vendimi për titullin e Afrikës pritet në fund të nëntorit

Senegali e fitoi finalen në fushë, por më pas u shpall humbës 3-0 nga CAF pas protestës së Marokut. Tashmë, Gjykata e Arbitrazhit Sportiv do të vendosë nëse trofeu do të mbetet në duart e “Luanëve të Atlasit” apo do t’i rikthehet Senegalit. Zvicra - Çështja e finales së diskutuar të Kupës së Afrikës 2025 do të mbetet pezull edhe për disa javë. Gjykata e Arbitrazhit Sportiv (CAS) ka njoftuar se vendimi përfundimtar për përballjen mes Marokut dhe Senegalit pritet të jepet në fund të nëntorit 2026, duke lënë të hapur enigmen për fatin e titullit kontinental. Senegali e fitoi finalen e 18 janarit me rezultatin 1-0, në një ndeshje të shoqëruar me tensione dhe polemika. Megjithatë, më 17 mars, Komisioni i Apelit i Konfederatës Afrikane të Futbollit (CAF), pas ankesës së Federatës Marokene, vendosi të ia japë fitoren Marokut në tavolinë, me rezultatin 3-0. Vendimi u mbështet në largimi i lojtarëve senegalezë nga fusha para përfundimit të ndeshjes dhe pa lejen e gjyqtarit. Federata Senegaleze e Futbollit nuk e pranoi këtë vendim dhe iu drejtua CAS-it, duke kërkuar rishqyrtimin e çështjes. Tashmë, të dyja palët duhet të presin përfundimin e procesit në Lozanne. Njëmbëdhjetë ditë pas seancës degjimore ku u paraqitën argumentet e delegacioneve të Senegalit dhe Marokut, CAS konfirmoi se trupi arbitral po vijon shqyrtimin e dosjes. Gjykata beri të ditur se arbitrat kanë vendosur të publikojnë një vendim të plotë, ku do të përfshihen edhe arsyetimet ligjore që do të mbështesin përfundimin e tyre. Kjo kërkon kohë shtesë, ndaj verdikti nuk pritet përpara fundit të nëntorit. Deri atëherë, mbetet e paqartë nëse Maroku do ta ruajë titullin e marrë pas vendimit të CAF-it apo Senegali do të rikthejë në duart e veta trofeun që fitoi në fushë. Vendimi i CAS-it do të jetë përcaktues për një nga çështjet më të debatueshme të futbollit afrikan të këtij viti.