Tensionet në Tiranë, protestuesit sulmojnë Ministrinë e Brendshme dhe Gjykatën e Apelit
Protesta e shtatë në Tiranë u përshkallëzua sot me përplasje mes protestuesve dhe policisë, ndërsa kulmoi me sulmin ndaj Gjykatës së Apelit. Protestuesit përdorën molotovë dhe gurë për të sulmuar institucionet, ndërsa policia përgjigjet me gaz, ujë dhe plumba gome.
Protesta e shtatë në Tiranë nisi gjatë paradites, me masa të shtuara sigurie dhe kontrolle nga policia. Protestuesit u grumbulluan para Ministrisë së Arsimit dhe filluan të këndonin dhe të valle, por situata nisi të ndryshonte rreth orës 12:30, kur disa të rinj shkuan në sulm dhe filluan të hedhin gurë dhe kapsolla drejt efektivëve. Policia përdori gaz lotsjellës dhe ujë me presion për të shpërndarë protestuesit dhe për t’i larguar nga zona e Ministrisë së Arsimit.
Përplasjet u zhvendosën më pas në Rrugën e Durrësit dhe në zonën e njohur si “Kafe Flora”. Policia u kërkoi qytetarëve të largoheshin nga rruga dhe vijoi ndërhyrjen me ujë dhe gaz lotsjellës. Efektivët nuk lejuan rigrumbullimin e protestuesve, të cilët u zhvendosën më pas drejt bulevardit “Dëshmorët e Kombit”.
Rreth orës 14:00 situata u përshkallëzua sërish. Një grup protestuesish të maskuar iu drejtua Gjykatës së Apelit në Tiranë dhe sulmoi godinën. U thyen dyer dhe xhama, ndërsa disa prej tyre hynë brenda ambienteve të institucionit. Pamjet nga brenda gjykatës treguan dëmet e shkaktuara, ndërkohë që në godinë kishte ende punonjës.
Pas këtij momenti, policia nisi aksionin për shpërndarjen e grupeve të protestuesve dhe shoqërimin e personave të përfshirë në incidentet e dhunshme. Sipas Policisë, për dëmtimin e dyerve dhe dritareve të Gjykatës së Apelit u identifikuan 20 persona, pesë prej tyre u arrestuan dhe 15 u shpallën në kërkim. U sekuestrua gjithashtu një sasi lëndësh piroteknike.
Protestuesit qëndruan përpara kryeministrisë për disa orë pa asnjë konfrontim me policinë. Por rreth orës 18;00 pasi filluan marshimin në bulevard, situata pranë Ministrisë së Brendshme është tensionuar përsëri. Protestuesit u ndanë në dy grupe dhe filluan të godisnin me mjete pirroteknike Ministrinë e Brendshme, ndërsa policia ka ndërhyrë me autobotë në përpjekje për të shpërndarë turmën.