735 akademikë shqiptarë i drejtohen Ramës për protestën

Një grup i madh akademikësh shqiptarë kanë dalë me një deklaratë prej pesë pikash drejtuar kryeministrit Edi Rama për protestat në vend. Deklarata e nënshkruar nga 735 akademikë i bën thirrje Ramës për dorëheqje dhe krijim të një qeverie teknike si rrugë për paqen e vendit.

"U bëhet thirrje kryeministrit të hapë rrugët e paqësimit të vendit duke dhënë dorëheqjen. Kërkohet krijimi i një qeverie kujdestare për të siguruar stabilitetin institucional dhe respektuar vullnetin qytetar.

Policia e Shtetit dhe trupat e rendit u kërkohet të ndalin menjëherë aktet e dhunës ndaj studentëve dhe të refuzojnë prerazi zbatimin e urdhrave të paligjshëm.

Përfaqësive diplomatike në Tiranë u kërkohet të ndërhyjnë publikisht për të ndalur shkeljen e të drejtave dhe lirive themelore.

Protestuesve u bëhet thirrje të ruajnë bizneset dhe pronën publike dhe private, duke i hequr regjimit çdo alibi apo pretekst për të ushtruar dhunë dhe për të delegjitimuar revoltën.

Qytetarët e Tiranës u kërkohet të dalin në zot të rinjve dhe të bëhen mburojë ndaj dhunës shtetërore, njëlloj si në ditët historike të rënies së diktaturës."