Protestat në Shqipëri: një revoltë për perspektivë të humbur
Protestat në Shqipëri janë shpërthyera në një revoltë kombëtare, pasi të rinjtë kanë filluar të kërkojnë dorëheqjen e kryeministrit Edi Rama. Protestuesit kanë shprehur zemërime të mëdha ndaj qeverisë për mungesën e perspektivës ekonomike dhe për korrupsionin.
Mesditën e së hënës në Tiranë, një vajzë e re u vendos përpara një autoboti të blinduar, duke u përpjekur të ndalonte përparimin e tij në bulevardin “Zhan D’Ark”. Pamja e saj sillte ndër mend fotografinë ikonike të “Tank Man”, protestuesit të paidentifikuar që më 5 qershor 1989 u vendos përpara një kolone tankesh në Pekin.
Protesta nisi paqësisht, por policia ndërhyri për shpërndarjen e saj me gaz lotsjellës dhe ujë me presion. E hëna ishte një tjetër ditë përshkallëzimi, me përleshje midis protestuesve dhe policisë dhe arrestime masive gjatë orëve të mbrëmjes.
Pika e kthesës erdhi më 13 tetor, kur mijëra studentë dhe gjimnazistë iu bashkuan lëvizjes, pas një thirrjeje për mobilizim kombëtar të shpallur tri ditë më parë. Të rinjtë u mblodhën përpara Ministrisë së Arsimit në Tiranë, duke i dhënë një shtysë të re revoltës kundër qeverisë.
Protesta u përshkallëzua në përleshje, pasi demonstrues hodhën gurë dhe sende të forta drejt Ministrisë së Arsimit, ndërsa policia ndërhyri me gaz lotsjellës dhe ujë me presion. Në ditët pasuese, protestat u përhapën edhe në qytete të tjera të vendit, me nxënës dhe studentë që bojkotuan mësimin për të kërkuar dorëheqjen e Ramës.
Mobilizimi i të rinjve e shndërroi një lëvizje qytetare që po humbiste vrullin në një revoltë kombëtare, ndërsa përplasjet me policinë, arrestimet masive dhe denoncimet për përdorimin e forcës thelluan krizën politike dhe tensionet shoqërore.
Mes protestuesve të së hënës ishte edhe Çeleste Fejzo, e cila ruan ende një ftesë të marrë nga Edi Rama në vitin 2013, kur ishte nxënëse ekselente. Rama e kishte ftuar të merrte pjesë në një aktivitet të nismës “Shqipëria e Gjeneratës Europiane”, që premtonte një të ardhme më të mirë për brezin e ri.
Për të, kontrasti mes shpresave të dikurshme dhe realitetit të sotëm ishte i thellë. “Nuk ka lidhje fare Shqipëria që po na ofrohet”, tha ajo për BIRN. Fejzo kundërshton etiketimet e kryeministrit ndaj studentëve dhe gjimnazistëve që protestojnë, duke e konsideruar revoltën e tyre një kauzë që i tejkalon ndarjet politike.
Ardit Demiraj, një protestues 29-vjeçar, tha se revolta lidhet drejtpërdrejt me pamundësinë për të ndërtuar një jetë normale. “Këtu janë çdo gjë më shtrenjtë se jashtë shtetit, domethënë më shtrenjtë se Franca apo Italia”, tha ai për BIRN. “Atëherë njerëzit kur iu dhemb barku, kuptohet që acarohen më shumë,” shtoi ai, duke u ankuar për koston e jetesës dhe korrupsionin.