Franca në kaos nga protestat, kryeministri Lecornu paralajmëron gjendjen e jashtëzakonshme
Protestat në Francë po vazhdojnë të shkaktojnë trazira dhe dhunë në qytetet e vendit, ndërsa qeveria po shqyrton masa të reja për të përballuar situatën.
Kryeministri Sébastien Lecornu deklaroi se shpallja e gjendjes së jashtëzakonshme mbetet një mundësi, nëse situata e kërkon. Ai tha se është plotësisht i vendosur të rikthej rendin dhe nuk e përjashton përdorimin e kësaj mase. Megjithatë, ai theksoi se, në rrethanat aktuale, vendosja e shtetrrethimeve lokale duket një zgjidhje më e përshtatshme për të përballuar situatën.
Lecornu u ka kërkuar autoriteteve rajonale të shqyrtojnë vendosjen e shtetrrethimeve të kufizuara në zona të caktuara, veçanërisht për të mbrojtur bizneset nga grabitjet dhe aktet e vandalizmit. Sipas autoriteteve franceze, trazirat e fundjavës kanë prekur të paktën 3 mijë biznese. Qeveria ka njoftuar se ato do të përfitojnë nga një fond i posaçëm mbështetës, krahas masave të tjera për të përballuar dëmet e shkaktuara.
Kryeministri u përpoq gjithashtu të qetësonte opinionin publik, duke theksuar se dhuna nuk është përhapur në të gjithë territorin francez, por është përqendruar kryesisht në disa qendra urbane. Në mes të krizës, ministri i Brendshëm francez, Laurent Nuñez, paraqiti dorëheqjen, duke argumentuar se policia kishte humbur kontrollin në disa qytete gjatë fundjavës. Megjithatë, presidenti Emmanuel Macron nuk e pranoi dorëheqjen e tij.
Ndërkohë, autoritetet po përgatiten të shtojnë masat e sigurisë dhe të përcaktojnë zonat ku do të zbatohen kufizimet e lëvizjes. Trazirat e fundjavës pasojnë disa javë demonstratash studentore, ku kërkohen kushte më të mira në shkolla. Përshkallëzimi i dhunës ka shtuar presionin mbi qeverinë franceze, në një periudhë kur vendi po i afrohet zgjedhjes së pasuesit të presidentit Macron. Lecornu akuzoi lëvizjen e së majtës ekstreme se po përpiqet të nxisë trazira të thella në vend përpara zgjedhjeve të ardhshme.