Koçiu: Kush i vë zjarrin qytetit është dhunues

Zv.Kryeministrja Albana Koçiu ka reaguar përmes rrjetave sociale për protestat e studentëve, që të henë në ditën e 7-të, ndërsa nuk kanë munguar përplasjet e forta mes protestuesve dhe forcave të rendit. Koçiu në reagimin e saj bën një ndarje të qartë mes të drejtës për të protestuar dhe akteve të dhunës, që i konsideron të papranueshme. Koçiu shprehet se kush shkatërron bizneset, sulmon Policinë e Shtetit dhe i vë zjarrin kryeqytetit, nuk është protestues, është dhunues. "Ti themi gjërat hapur dhe me emrin që kanë. Kush shkatërron bizneset, sulmon Policinë e Shtetit dhe i vë zjarrin kryeqytetit, nuk është protestues. Është dhunues. Protesta paqësore është një e drejtë demokratike që duhet respektuar dhe mbrojtur. Dhuna dhe vandalizmi, jo! Tirana është kryeqyteti europian i të gjithë shqiptarëve dhe nuk duhet të kthehet kurrë në simbol të dhunës, shkatërrimit dhe kaosit", shkruan Koçiu.