Pedagogët në krah të studentëve protestues, thirrje për marshim solidariteti para Politeknikut

Sindikata e Punonjësve të Universiteteve të Shqipërisë (SPUSH) ka qenë në mbështetje të studentëve që prej fillimit të protestave, duke bërë të ditur se po e ndjek me shqetësim të madh mënyrën se si autoritetet po menaxhojnë situatën. Përmes marshimit të solidaritetit, sindikata synon të shprehë mbështetjen e saj për studentët dhe të kundërshtojë veprimet e policisë ndaj tyre.

Në një njoftim publik, sindikata shpreh shqetësimin për situatën e krijuar gjatë protestave studentore, të cilat vijojnë prej gjashtë ditësh, duke denonë atë që e konsideron si dhunë policore ndaj protestuesve. SPUSH thekson se ka qenë në mbështetje të studentëve që prej fillimit të protestave dhe po ndjek me kujdes dhe shqetësim të jashtëzakonshëm dhunën policore, e cila nuk njeh as protokolle institucionale dhe as humanizëm njerëzor.

Ndërkohë, një ditë më parë, 963 pedagogë, akademikë dhe përfaqësues të jetës publike nënshkruan një deklarate me pesë pikë, ku kërkojnë dorëheqjen e kryeministrit Edi Rama, krijimin e një qeverie kujdestare, si dhe garantimin e respektimit të të drejtave dhe lirive themelore. Protestat antiqeveritare në Tiranë vijuan për të shtatë ditë radhazi, me përplasje mes protestuesve dhe forcave të policisë në disa zona të kryeqytetit. Tensionet u përshkallëzuan pranë Ministrisë së Brendshme, ku një grup të rinjsh sulmuan godinën dhe policinë, ndërsa efektivët u përgjigjën me gaz lotsjellës, granata tymuese dhe autobotë me ujë. Sipas raportimeve, gjatë ndërhyrjeve u përdoren edhe plumba plastike. Përplasjet vijuan edhe në Rrugën e Dibrës dhe në rrugët përreth, ku protestuesit hodhën gurë, molotov dhe fishekzjarë drejt policisë dhe ndërtesave qeveritare, si dhe u vunë flakën kazanëve të mbeturinave. Ndërkohë, forcat e rendit ndërhynë për shpërndarjen e turmave, duke ndjekur dhe arrestuar disa prej demonstruesve. Gjatë zhvillimit të protestave u ngritën gjithashtu shqetësimet për kufizimet ndaj gazetarëve në mbulimin e ngjarjeve. Kërkesa kryesore e protestuesve mbetet dorëheqja e kryeministrit Edi Rama.