14 viktimat në një tragjedi në Kolumbi, rrëshqitja e dheut në një minierë ari

Një tragjedi ka ndodhur në jugperëndim të Kolumbisë, ku një rrëshqitje dheu në një minierë të paligjshme ari ka shkaktuar vdekjen e 14 personave, ndërsa shtatë të tjerë kanë mbetur të plagosur. Lajmi u bë i ditur të hënën nga një zyrtar rajonal, i cili konfirmoi se operacionet e kërkim-shpëtimit për gjetjen e të mbijetuarve kanë përfunduar.

Ngjarja ndodhi në rajonin e Narinos, pranë kufirit me Ekuadorin, një zonë e njohur për aktivitetin e minierave të paligjshme dhe praninë e grupeve të armatosura, të cilat kontrollojnë tregtinë klandestine të arit, trafikun e drogës dhe aktivitete të tjera kriminale. Pamjet e shpërndara në rrjetet sociale tregojnë momentet e evakuimit të trupave nga miniera, me ndihmën e një ekskavatori dhe një kanoeje në një lumë aty pranë.

Sekretari i Paqes dhe Sigurisë i Narinos, Alex Gonzalez, konfirmoi bilancin tragjik për televizionin Caracol, duke bërë të ditur se kërkimet për të mbijetuarit kishin përfunduar. Sipas zyrës së guvernatorit, ekipet e shpëtimit u përballën me vështirësi të mëdha për të mbërritur në vendngjarje, për shkak të terrenit të vështirë dhe pranisë së grupeve kriminale në zonë.

Ndërkohë, një burim nga zyra e guvernatorit i tha agjencisë së lajmeve AFP se mungesa e alternativave ekonomike i detyron shumë komunitete lokale të angazhohen në aktivitete të rrezikshme. Sipas tij, minierat tradicionale në shkallë të vogël janë zhdukur pothuajse plotësisht.

Aksidentet në miniera janë të shpeshta në Kolumbi, veçanërisht në zonat ku aktiviteti minerar zhvillohet pa rregullim dhe pa masa të mjaftueshme sigurie. Situata në rajonin e Narinos mbetet gjithashtu e tensionuar për shkak të dhunës së grupeve të armatosura. Banorët vendas kanë raportuar vrasje të qëllimshme, të lidhura me dyshime për bashkëpunim me forcat e sigurisë ose organizatat rivale, si dhe me vjedhjen e arit.