Rama përsërit thirrjen për dialog, nxjerr karriget para Kryeministrisë

Pas një jave protestash të shoqëruara me tensione, përplasje me forcat e policisë dhe sulme ndaj institucioneve, kryeministri Edi Rama ka përsëritur apelin e tij për dialog. Në shenjë simbolike, përpara godinës së Kryeministrisë janë vendosur karrige të shoqëruara me pankartat ku shkruhet “Dialog”. Kreu i qeverisë e ripërsëriti edhe një ditë më parë gatishmërinë për të zhvilluar bisedime, duke nënvizuar se dialogu nuk mund të zhvillohet me persona që përdorin dhunën. Rama ka deklaruar se mbetet i hapur për të dëgjuar dhe shqyrtuar kërkesat e qytetarëve që protestojnë në mënyrë paqësore, ndërsa ka paralajmëruar masa të rrepta ndaj individëve që përfshihen në akte të dhunshme.