Avokati i Popullit publikon gjetjet pas protestës në Tiranë: Pretendime për dhunë dhe mangësi në trajtimin e të miturve

Gjatë ditës së 19 tetorit, policia ka shoqëruar 50 persona, 32 të rritur dhe 18 të mitur. Në Bllokun e Sigurisë ndodheshin 109 persona të arrestuar, ndërsa në Spitalin e Traumës kanë marrë trajtim mjekësor 34 persona, mes tyre 21 punonjës policie, 7 protestues dhe 5 kalimtarë.

Ekipet e Avokatit të Popullit kanë kontaktuar gjithsej 193 persona të ndaluar, të arrestuar ose të pranishëm në spital dhe kanë administruar 11 ankesa, 10 prej të cilave në Bllokun e Sigurisë. Pretendimet për dhunë janë shumë të rëndësishme, duke përfshirë goditje me bombola gazi, tërheqje zvarrë dhe dhunë fizike e psikologjike.

Mangësi në trajtimin e të miturve janë konstatuar në Komisariatin nr. 1, ku të miturve nuk u ishte dhënë formulari i të drejtave në versionin për fëmijë, ndërsa gjashtë prej tyre ishin regjistruar në regjistrin e të rriturve. Avokati i Popullit ka ngritur shqetësime edhe për mbingarkesën në Bllokun e Sigurisë, ku ndodheshin 109 persona, duke përmendur mungesën e shtretërve, ujit, ngrohjes dhe kujdesit mjekësor.

Avokati i Popullit kërkon identifikimin e detyrueshëm të punonjësve të policisë, uljen e menjëhershme të mbingarkesës në Bllokun e Sigurisë dhe vendosjen e kamerave në ambientet e shoqërimit dhe intervistimit, si dhe ruajtjen e pamjeve të 19 tetorit. Institucionit të Policisë së Shtetit i kërkohet gjithashtu të mos kryejë kontrolle të telefonave apo të kërkojë fjalëkalime pa bazë ligjore, të garantojë praninë e prindit ose kujdestarit dhe të psikologut gjatë intervistimit të të miturve, si dhe të përmirësojë dokumentimin e shoqërimeve dhe kujdesin mjekësor.