Studentët refuzojnë dialogun me Ramën, kërkojnë largimin e tij

Studentët kanë refuzuar dialogun e kërkuar nga kryeministri Edi Rama, duke vazhduar protestat para Kryeministrisë dhe kërkuar dorëheqjen e tij. Në mënyrë simbolike, protestuesit kanë ngjitur muret pranë godinës së qeverisë fotografitë e të rinjve që janë dhunuar gjatë protestave të zhvilluara për gjatë javës së fundit. Poshtë fotografive është vendosur pyetja “Dialog?”, duke shprehur kundërshtimin e studentëve ndaj ftesës së kryeministrit për dialog. Qëndrimi i studentëve është mbështetur edhe nga pedagogët, të cilët kanë zhvilluar një marshim në mbështetje të të rinjve dhe kundër dhunës së ushtruar ndaj protestuesve. Prej një javë, studentët protestojnë çdo ditë, duke kërkuar largimin e Ramës dhe lirimin e të rinjve të ndaluar gjatë protestave.