36-vjeçari i dënuar për drogë kapet në Durrës

Një 36-vjeçar i dënuar me 3 vite e 4 muaj burg për prodhim dhe shitje të narkotikëve është kapur dhe arrestuar nga Policia e Durrësit. Sipas policisë, specialistët e Seksionit për Hetimin e Narkotikëve në Drejtorinë Vendore të Policisë Durrës, pas sigurimit të informacioneve për vendndodhjen e tij, organizuan veprimet që çuan në lokalizimin, kapjen dhe ndalimin e 36-vjeçarit.

Ai ishte dënuar me 3 vjet e 4 muaj burgim për veprën penale “Prodhimi dhe shitja e narkotikëve”. “I dënuar me 3 vjet e 4 muaj burgim, për prodhim dhe shitje të narkotikëve, kapet dhe vihet në prangë 36-vjeçari i shpallur në kërkim. Specialistët e Seksionit për Hetimin e Narkotikëve të DVP Durrës, si rezultat i veprimeve të shpejta policore të kryera pas sigurimit të informacioneve për vendndodhjen e një shtetas në kërkim, bënë të mundur lokalizimin, kapjen dhe ndalimin e shtetasit: J. K., 36 vjeç, banues në Kavajë. Ky shtetas ishte shpallur në kërkim pasi Gjykata e Shkallës së Pare e Juridiksionit të Përgjithshëm Durrës e ka dënuar me 3 vjet e 4 muaj burgim, për veprën penale “Prodhimi dhe shitja e narkotikëve”. Materialet procedurale i kaluan Prokurorisë, për veprime të mëtejshme”, shkruan Policia.