Jio planon ofertën më të madhe publike në historinë e saj në Indi
Kompania e telekomunikacionit dhe teknologjisë Jio, e pronësuar nga miliarderi Mukesh Ambani, po planon të lansojë ofertën më të madhe publike në historinë e saj në Indi, duke synuar të rritë vlerësimin në 108.3 miliardë dollarë.
Kompania Jio, e cila numëron Meta dhe Google mes investitorëve të saj strategjikë, pret të hapë ofertën publike më 21 tetor dhe ta mbyllë më 23 tetor, përpara debutimit të planifikuar në burse më 28 tetor. Sipas Reuters, Jio synon të sigurojë deri në 3.2 miliardë dollarë përmes shitjes së 270 milionë aksioneve të reja, duke tejkaluar ofertat e mëparshme publike në tregun indian. Cmimi i aksioneve është përcaktuar në një interval prej 1,065 deri në 1,119 rupi, ndërsa analistët vlerësojnë se debutimi në burse mund të shoqërohet me një rritje fillestare të cmimit prej 15% deri në 20%. Jio u themelua në vitin 2016 dhe ndryshoi rrënjësisht tregun indian të telekomunikacionit përmes ofertave me kosto të ulët për internetin dhe telefoninë celulare. Sot kompania numëron rreth 533 milionë abonentë dhe kontrollon afërsisht 60% të trafikut të të dhënave në Indi, duke qenë një nga operatorët më të mëdhenj të telekomunikacionit në botë. Përtej telefonisë, aktiviteti i Jio është zgjeruar në shërbimet cloud, inteligjencës artificiale dhe infrastrukturës dixhitale për bizneset. Oferta publike vjen në një moment kur investitorët po vlerësojnë mundësinë e rritjes së kompanive teknologjike në Indi, një nga tregjet më të madha të konsumatorëve dixhitalë në botë. Një pjesë e kapitalit që do të sigurohet nga oferta synohet të përdoret për reduktimin e borxhit, ndërsa aktivitetet e inteligjencës artificiale dhe shërbimeve dixhitale mbeten në drejtimet e zgjerimit të grupit. Meta dhe Google janë ndër investitorët më të rëndësishëm ndërkombëtarë të Jio, me pjesëmarrje përkatësisht prej rreth 10% dhe 7.7%. Oferta vjen gjithashtu në një periudhë transformimi të Reliance Industries, grupit të kontrolluar nga familja Ambani, që operon në sektorët nga energjia dhe shitjet me pakicë deri te telekomunikacioni. Debutimi i Jio në burse do të jetë një nga ngjarjet më të mëdha financiare të vitit në Azi dhe një provë e rëndësishme për kërkesën e investitorëve ndaj kompanive teknologjike me bazë të gjerë konsumatorësh.