Avokati i Popullit zbardh raportin e Komisionerit për shoqërimin e protestuesve në komisariatet e policisë
Avokati i Popullit ka publikuar një raport paraprak për monitorimin e shoqërimit të protestuesve në komisariatet e policisë, sipas të cilës rreth 50 persona u shoqëruan në komisariatet e policisë, mes tyre 18 të mitur. Raporti evidenton pretendime për dhunë fizike dhe psikologjike nga punonjësit e policisë, përdorimin e sprajit me piper dhe gazit lotsjellës, goditje me bombola gazi dhe tjerash.
Komisioneri i Mekanizmit Kombëtar për Parandalimin e Torturës, pranë Avokatit të Popullit, ka publikuar një raport paraprak për monitorimin e shoqërimit të protestuesve në komisariatet e policisë. Raporti tregon se rreth 50 persona u shoqëruan në komisariatet e policisë, mes tyre 18 të mitur.
Në raportin e publikuar, evidentohen pretendime për dhunë fizike dhe psikologjike nga punonjësit e policisë së Shqipërisë gjatë ndalimit dhe shoqërimin. Të shoqëruarit kanë raportuar përdorimin e sprajit me piper dhe gazit lotsjellës, goditje me bombola gazi, si dhe raste të tjerë të tërheqjes zvarrë.
Komisioneri thekson se çdo rast i dhunës ndaj një të mitur gjatë shoqërimit përbën shkelje të rendit dhe se personat përgjegjës duhet të mbajnë përgjegjësi.
Sipas raportit, një prej ankuesve pretendoi se ishte goditur në një zyrë të Komisariatit nr. 4, ku nuk ka kamera sigurie. Gjithashtu, disa të mitur dhe të rritur deklaruan se punonjësit e policisë u kishin kërkuar të zhbllokonin telefonat cellulare dhe të lejonin kontrollin e të dhënave personale, pa vendim gjykate. Disa prej tyre pretenduan se këto kërkesa ishin bërë edhe në mungesë të një akuze nga prokuroria.
Në raport përmenden edhe pretendime se disa persona janë shoqëruar në komisariat pa një shkak ligjshëm, pasi, sipas deklarimeve të tyre, ishin kalimtarë të rastit dhe nuk kishin lidhje me protestën.
Gjatë monitorimit në komisariatet nr. 2 dhe nr. 4, janë evidentuar punonjës policie pa numra identifikues, si dhe mungesa në të dhënata e regjistrave të shoqërimi.
Ndërkohë, në Bllokun e Sigurisë janë shoqëruar 109 persona, mes tyre një i mitur dhe katër gra. Raporti evidenton mbingarkesë të ambienteve dhe mungesë të shtretëreve, ujit, ngrohjes dhe kujdesit mjekësor.
Për këto situata, Avokati i Popullit i kërkon Ministrisë së Brendshme të ndërhyjë urgjentisht për të ulur numrin e personave të mbajtur në Bllokun e Sigurisë dhe për të mundësuar transferimin e tyre në ambiente të tjera që respektojnë kapacitetet ligjore.