Qeveria shkel procedurën ligjore me shpërblimin e policëve që dhunojnë studentët

Qeveria ka miratuar një vendim për shpërblimin e policëve që dhunojnë studentët, por vendimi ngre pyetje mbi respektimin e procedurave ligjore. Vendimi i qeverisë është në kontrast me Ligjin për Menaxhimin e Sistemit Buxhetor, i cili parashikon që përdorimi i fondit rezervë të miratohet nga Këshilli i Ministrave me kërkesë të ministrit përgjegjës për financat.

Në vendim rezulton të jetë shënuar propozimi i ministrit të Brendshëm, çka ngre pikëpyetje mbi respektimin e procedurës ligjore. Në lidhje me këtë ka reaguar dhe gazetarja Ola Xama, e cila ka publikuar dokumentet e miratimit të VKM-së si dhe shkeljet e bërë nga qeveria. Gazetarja shtron pyetjen se mbi çfarë bazë ligjore do të veprojnë degët e thesarit për të kaluar fondet, nëse vendimi nuk ka hyrë ende në fuqi dhe procedura e miratimit nuk është ndjekur sipas kërkesave ligjore.

Në lidhje me këtë, Ola Xama shkruan: "Një ditë më parë Këshilli i Ministrave miratoi me shpejtësi vendimin për shpërblimin me 269 mijë lekë të 2,750 punonjësve të Policisë së Shtetit. Efekti financiar në buxhetin e shtetit prej 740 milion lekë (8.15 milion euro) do të përballohet nga fondi rezervë i buxhetit të shtetit. Ligji për Menaxhimin e Sistemit Buxhetor lejon që përdorimi i fondit rezervë të miratohet nga qeveria me kërkesë të Ministrit të Financave, dhe jo atij të Punëve të Brendshme siç ka ndodhur dhe shkruhet në kokën e vendimit. Pasi akti publikohet në Fletoren Zyrtare, formati i shkruar dhe elektronik, atëherë merr formë ligjore. Këtë e thotë qartë neni 117 i Kushtetutës dhe neni 11 i Ligjit për Organizimin dhe Funksionimin e Qendrës së Botimeve Zyrtare.

Por ka një problem, formati elektronik i Fletores Zyrtare prej një jave nuk është në gjendje pune. Atëherë çfarë akti do të zbatojë për të kaluar shpërblimin e policëve degët e thesarit kur ai është në shkelje sepse 1) është miratuar në kundërshtim me Ligjin për Menaxhimin e Sistemit Buxhetor dhe 2) nuk ka hyrë ende në fuqi? Që të marrin pagesën, policët duhet të presin që qeveria të miratojë një VKM të ri me propozim të Ministrit të Financave dhe punonjësve të kontraktorëve të AKSHI-t të rregullojnë sistemet. Rruga tjetër është që Thesari të shkelë ligjin, "shkruan Ola Xama.