Grupi Parlamentar i PD-së kërkon seancën urgjente të Kuvendit për diskutimin e protestës shtetërore
Grupi Parlamentar i Partisë Demokratike ka drejtuar një kërkesë zyrtare kryetarit të Kuvendit, Niko Peleshi, për thirrjen e një seance plenare urgjente për diskutimin e protestës shtetërore të studentëve dhe të rinjve.
Gjatë tetë ditëve të protestës, studentët dhe të rinjtë shqiptarë kanë artikuluar kërkesën e vetme për largimin e Kryeministrit Edi Rama. Këto ditë kanë shfaqur akte të rënda dhune ndaj të rinjve, duke përfshirë fraktura të gjymtyrëve, dëmtime në kokë dhe lëndime të tjera trupore. Këto akte, të cilat dëshmojnë një përdorim shqetësues dhe të papranueshëm të forcës nga Policia e Shtetit, nuk kanë kursyer as të miturit, gratë dhe vajzat.
Kuvendi i Shqipërisë nuk ka ndërmarrë hapa për të kërkuar llogaridhënie institucionale lidhur me veprimet e punonjësve të Policisë shtetërore, dhe ka anuluar edhe seancën plenare të parashikuar, pa njoftim paraprak dhe pa dhënë një shpjegim të arsyetuar për këtë vendim. Në këto kushte, Grupi Parlamentar i PD-së kërkon thirrjen e një seance plenare urgjente për diskutimin e protestës shtetërore dhe për të kërkuar përgjegjësi për çdo shkelje të ligjit të konstatuar.