Jorida Tabaku: Rama po përdor mjetet e fundit për të mbajtur qeverinë në pushtet

Deputetja e Partisë Demokratike, Jorida Tabaku, ka reaguar përgjigjje për situatën e krijuar gjatë protestave në Tiranë, duke deniuar dhunën ndaj protestuesve dhe duke e konsideruar pjesëmarrjen e pedagogëve në tubim si një zhvillim me rëndësi.

Në një prononcim nga protesta para Ministrisë së Arsimit, Tabaku u bëri thirrje pedagogëve, intelektualëve dhe prindërve që të bashkohen për të mbrojtur të rinjtë.

Ajo theksoi se në tubim ndodhet si pedagoge, ashtu edhe si deputete, ndërsa e cilësoi daljen e pedagogëve në shesh si një sinjal i fortë, veçanërisht pas deklaratave të kryeministrit Edi Rama një ditë më parë.

Duke folur për shoqërimet në policinë, deputetja pretendoi se pjesa dermuese e personave të ndaluar janë studentë dhe qytetarë, ndërsa kundërshtoi pretendimet për përfshirjen e elementëve ekstremistë apo personave të huaj. Sipas saj, mes të shoqëruarve ka pasur edhe kalimtarë, ndërsa akuzoi policinë për trajtim çnjerëzor ndaj protestuesve dhe për ushtrim dhunë në disa raste.

Tabaku bëri gjithashtu dallimin mes efektivëve që kryejnë detyrën me ndershmëri dhe atyre që veprojnë në mënyrë agresive duke zbatuar urdhra. Ajo u shpreh se punonjësit e policisë përballen me kushte të vështira gjatë shërbimit, por kritikoi sjelljen e atyre që, sipas saj, përdorin forcën ndaj protestuesve.

"Jam këtu si pedagoge dhe si deputete. Dje, pas kërcënimit të Ramës, sot pedagogët dolën në shesh. Ky është një sinjal i fortë. Bashkimi i pedagogëve, i çdo zëri, i intelektualëve dhe i prindërve për të mbrojtur fëmijët duhet të ishte gjëja e pare që duhej të ndodhte.

Ka disa raste ekstreme, por persona me aftësi të kufizuara janë shoqëruar në komisariate. Është ushtruar dhunë kudo. Në 90% të rastëve të të shoqëruarve nuk ka pasur ekstremistë, por studentë. Nuk ka pasur as duar të huaja. Nëse ka, ku janë? Një pjesë e madhe janë kalimtarë dhe një pjesë studentë pjesëmarrës në protestë. Ka pasur sjellje çnjerëzore ndaj protestuesve.

Dua të bej një dallim të madh mes atij kontingjenti të ndershëm në Policinë e Shtetit, që sot është lënë në meshirë të fatit. Ata kanë qenë 24 ore pa ngrënë dhe kanë familje. Por ka edhe një kontingjent tjetër, që sillet egër dhe zbaton urdhra. Mendoj se një pushtet që përdor dhunë, që krijon një konflikt të tillë dhe që rrezikon sot paqen sociale, duke i vendosur bizneset kundër policisë, po përdor mjetet e fundit! Shpresoj shumë që kjo të përfundojë në mënyrë normale.

Dua të them: hajde të mbrojmë fëmijët tanë!", tha Tabaku nga protesta.

Media që s’e dorëzon pavarësine e saj, i paraprine një qeverisje te ndershme. Pamfleti është një platformë mediatike analitike që u “lind” si domosdoshmëri e një tribune pa kompromis, si një zë i fuqishëm në luftën pa ekuivok ndaj krimit dhe korrupsionit politik në Shqipëri.