Nafta tejkalon 110 dollarë fuçia, arrin nivelin më të lartë 5 mujor

Çmimet e naftës në bursa arritën nivelin më të lartë pesë mujor. Nafta e papërpunuar brent tejakloi 110 dollarë për fuçi, çmimi më i lartë që nga 20 maji. Shqetësimet u shtuan më tej në tregje pas përshkallëzimit të sulmeve të rebelëve Huthi ndaj infrastrukturës energjetike saudite dhe raportimeve për sulme ndaj anijeve në Gjirin Persik.

Arabia Saudite, eksportuesi më i madh i naftës bruto në botë rriti prodhimin e naftës muajin e kaluar, pavarësisht ndërprerjeve në dërgesa të shkaktuara nga lufta. Por, goditjet në infrastrukturën e saj rrisin rrezikun për prodhimin dhe për dërgesat përmes Detit të Kuq, alternativa kryesore që shmang Ngushticën e Hormuzit.

Firma e gjurmimit të anijeve Kpler tha se të paktën 18 anije u sulmuan gjatë dy javëve të fundit. Nafta brent është rritur me gati 80% përgjatë këtij viti, ndërsa konflikti në Iran së bashku me luftën Rusi-Ukrainë ka ndikuar furnizimet duke rritur pasigurinë mbi flukset globale të karburanteve.

Eksportet e naftës ndërkohë janë rekuperuar së fundmi duke iu afruar niveleve të paraluftës, por dërgesat e produkteve të rafinuara mbeten ende të kufizuara. Megjithatë, sipas analistëve rimëkëmbja e dërgesave ende nuk ka hequr primin e rrezikut nga çmimet e naftës, me sulmet e vazhdueshme që po mbajnë tregtarët të vëmendshëm ndaj asaj që ndodh në tregje.