Të rinjtë ulen këmbëkryq para Kryeministrisë, policia shmang përballjen

Protestuesit vijojnë të qëndrojnë para Kryeministrisë, ku janë ulur këmbëkryq në bulevard, në shenjë revolte kundër qeverisë. Pas tetë ditësh protestash dhe përplasjesh me forcat e rendit, situata për momentin paraqitet e qetë.

Ndryshe nga ditët e mëparshme, policia ka ndryshuar mënyrën e vendosjes së forcave në terren. Dhjetëra efektivë, së bashku me një autobot me ujë me presion, janë pozicionuar brenda territorit të Kryeministrisë, duke shmangur ngritjen e një kordoni policor përreth godinës.

Kjo vendosje ka shmangur deri tani përballjen e drejtpërdrejtë mes protestuesve dhe efektivëve. Megjithatë, herë pas here, të rinjtë u drejtohen forcave të rendit me thirrje dhe geste sfiduese, ndërsa të dyja palët vijojnë të qëndrojnë në pozicionet e tyre.

Më herët, një grup protestuesish zhvendosën stacionin e autobusit që ndodhej përpara Piramidës së Tiranës, duke e vendosur si barrikadë përballë forcave të policisë, pranë Kryeministrisë.

Pavarësisht qetësisë së momentit, mbetet e paqartë nëse situata do të vijojë e tillë apo nëse do të ketë tentativa të tjera për t'u afruar godinës së qeverisë.

Ndërkohë, protestuesit vijojnë të qëndrojnë kërkesës së tyre për dorëheqjen e kryeministrit Edi Rama, duke refuzuar mundësinë e dialogut me të.