Sheshi "Skënderbej" mbulohet nga gazi lotsjellës, policia rrethon protestuesit

Situata është tensionuar sërish mbrëmjen e kësaj të martë në Sheshin Skënderbej, ku forcat e policisë kanë rrethuar një numër të madh protestuesish që ishin grumbulluar në qendër të Tiranës. Pas ndjekjes në rrugët përqark, efektivët kanë krijuar një rrethim rreth turmës. Në momentin kur demonstruesit kanë tentuar të largohen nga sheshi, policia ka hedhur gaz lotsjellës, duke i detyruar t'u shpërndahen mes reve të gazit.

Ndëryrja ka ndodhur pikërisht gjatë përpjekjes së protestuesve për t'u larguar nga zona, ndërsa forcat e rendit kishin zënë pozicione përqark sheshit. Përdorimi i gazit në këto rrethana ka sjellë një tjetër përballje mes policisë dhe demonstruesve.

Protestuesit ishin grumbulluar në Sheshin Skënderbej pasi policia i kishte shpërndarë më herët nga bulevardi “Deshmoret e Kombit”, ku gjatë mbrëmjes pati përplasje dhe ndëryrje me automjete ujëhedhëse dhe gaz lotsjellës.

Pavarësisht ndjekjes në disa akse rrugore, përfshirë Rrugën e Durrësit, një pjesë e madhe e demonstruesve ishte bashkuar sërish në sheshin qendror të kryeqytetit. Por edhe aty ata janë përballur me ndëryrjen e forcave të rendit.

Dita e tetë e protestave nisi me grumbullime dhe marshime në disa zona të Tiranës. Tensionet u regjistruan fillimisht pranë Ministrisë së Arsimit, ku disa të rinj hodhën gurë drejt efektivëve dhe policia reagoi me ujëhedhëse dhe gaz lotsjellës.

Më pas, turma u rikthye përpara Kryeministrisë, ku për një periudhë protestuesit kërcyen valle në bulevard. Qetësia u ndërpre nga përplasjet e reja, të cilat sollën shpërndarjen e demonstruesve dhe ndjekjen e tyre në rrugët e kryeqytetit.

Rrethimi i protestuesve në Sheshin Skënderbej dhe përdorimi i gazit lotsjellës në momentin kur ata po tentonin të largoheshin shënojnë zhvillimin më të fundit të mbrëmjes, ndërsa demonstratat kundër qeverisë së Edi Rame në vijojnë për të tetën ditë.