Trump dhe Vance ofrojnë shpërblime për qytetarët që denoncojnë abuzimet me fondet publike

Presidenti amerikan Donald Trump dhe zëvendëspresidenti JD Vance kanë prezantuar një program të ri për shpërblime financiare për qytetarët që japin informacione për mashtrimet financiare në vendet e Shteteve të Bashkuara. Programi, i quajtur "Fraud Whistleblower Incentive Program", ofron shpërblime deri në 30 mijë dollarë për informacione që çojnë në dënime për mashtrim ose në masa konkrete dhe të rëndësishme të autoriteteve federale për zbatimin e ligjit.

Qytetarët do të kenë mundësi të paraqesin informacione për raste të dyshimta përmes platformës elektronike fraud.gov. Megjithatë, paraqitja e një denoncimi nuk garanton automatikisht përfitimin e një shpërblimi financiar. Për të përfituar pagesën, informacionet e dorëzuara duhet të çojnë në një vendim dënimi për mashtrim ose në masa konkrete dhe të rëndësishme të autoriteteve federale për zbatimin e ligjit.

Shpërblimi maksimal është përcaktuar në 30 mijë dollarë për rast, ndërsa financimi fillestar i programit arrin në 25 milion dollarë. Administrata Trump synon të përqendrohet veçanërisht te mashtrimet në programet e ndihmës sociale, kujdesit shëndetësor dhe subvencioneve shtetërore, ku autoritetet amerikane po zhvillojnë kontroll për të identifikuar përfitimet e paligjshme.

Në mars të këtij viti, presidenti Trump krijoi një grup të posaçëm për luftën kundër mashtrimeve, duke i besuar drejtimin zëvendëspresidentit JD Vance. Ky grup ka marre përsipër të identifikojë rastet e përdorimit të paligjshëm të burimeve publike dhe të koordinojë veprimet e agjencive federale për hetimin dhe ndëshkimin e abuzimeve.

Zëdhënësja e Shtëpisë së Bardhë, Lauren Bis, deklaroi se administrata është e vendosur të luftojë keqpërdorimin e parave të taksapaguesve amerikanë. "Çdo ditë, grupi i posaçëm i presidentit Trump për eliminimin e mashtrimeve përqendrohet te abuzimi në shkallë të gjerë me paratë e taksapaguesve dhe u siguron amerikanëve llogaridhënien që meritojnë", deklaroi ajo.