Dekani Mark Marku: Largimi i Ramës nuk i zgjidh problemet, rrezikojmë të biem sërish në ciklin e liderëve autoritarë

Dekani i Fakultetit të Histori-Filologjisë, Mark Marku, ka propozuar përfshirjen e faktorëve të tjerë shoqërorë dhe politike për të gjetur një zgjidhje për situatën e krijuar nga protesta e studentëve. Marku ka thënë se protesta nuk mund të mbetet vetëm një përballje mes qytetarëve në shesh dhe qeverisë, por duhet të shndërrohet në një proces më të gjërë, ku të përfshihen aktorë të shoqërisë civile, partive politike dhe Parlamenti.

"Duhej të ketë reagim plural. Në kuptimin që duhet të futen disa forca të tjera, që duke i mbështetur studentët dhe duke kërkuar një zgjidhje në favor të tyre, duhej të bëhen edhe një lloj amortizatori i dhunës. Elementë të tjerë të shoqërisë civile... nuk mund të reduktohet një protestë e madhe që synon një ndryshim të madh, vetëm tek ata që janë në shesh", tha Marku.

Ai theksoi se edhe institucionet politike duhet të marrin përgjegjësi të tyre, duke nxisur se Parlamenti dhe forcat e ndryshme politike mund të luajnë rol në krijimin e një zgjidhjeje.

"Parlamenti duhet të rifaktorizohet, zgjidhja politike... Mos u bëni naivë nga pikëpamja e politikës", deklaroi Marku, duke shtuar se mund të krijohen dinamika të reja përmes partive të vogla, opozitës dhe faktorëve brenda së majtës.

I pyetur nëse largimi i kryeministrit Edi Rama do t'i zgjidhte problemet e vendit, Marku u shpreh se dorëheqja e një lideri nuk është zgjidhje automatike për problematikat e shoqërisë.

"Unë nuk mendoj që dorëheqja e një kryeministri i zgjidh problemet e një vendi, sepse ne po shkojmë me cikle drejt liderëve autoritarë. Na është dashur para 30 e sa viteve me regjimin komunist, na është dashur në '97-në ta bëjmë prapë me Partinë Demokratike... Pra, ne shkojmë automatikisht si shoqëri drejt një cikli të krijimit të një pushteti jashtëzakonisht të madh, të një nënshtrimi shumë të madh dhe pastaj të një revolte shumë të madhe", tha ai.

Sipas Markut, problemi thelbësor nuk qëndron vetëm te largimi i një kryeministri, por te mënyra se si funksionon shoqëria dhe krijohen mekanizmat e pushtetit. Në kundërshtim, vendi rrezikon të përsërisë të një skenar, duke zëvendësuar një lider me një tjetër, pa ndryshuar rrenjësisht mënyrën e qeverisjes.

"Dhe ideja është që kjo të mos realizohet prapë, që ne të mos na duhet që pas 10 vitesh të luftojmë prapë për heqjen e një lideri autoritar. Do të duhet që të fillojmë të funksionojmë në mënyrë shumë të strukturuar, që të krijojmë premisa që të mos shkojmë prapë aty. Se në qoftë se ikin ca deputetë, vijen ca deputetë të tjerë, ikën një lider autoritar, vjen një tjetër... Kjo është shoqëria që çon aty", përfundoi Marku.