Spahiu: Vetëm SHBA dhe BE mund t’i japin fund krizës në Shqipëri

Pas tetë ditësh protestash të shoqëruara me tensione dhe përplasje me policinë në Tiranë, juristi Kreshnik Spahiu ka deklaruar se zgjidhja e krizës politike nuk ndodhet në duart e partive kryesore në vend, por kërkon ndëryrjen e faktorit ndërkombëtar.

Në një analizë për emisionin “Repolitix”, Spahiu u shpreh se situata ka dalë jashtë kontrollit dhe se protestuesit janë pozicionuar kundër establishmentit politik, duke refuzuar edhe përfshirjen e kreut të Partisë Demokratike, Sali Berisha, në protestat e tyre.

Sipas Spahiut, Shtetet e Bashkuara të Amerikës dhe Bashkimi Evropian duhet të marrin rolin e ndërmjetësuesit për të shmangur përshkallëzimin e mëtejshëm të situatës dhe për të garantuar një marrëveshje mes palëve.

“Shqiptarët kurrë nuk kanë zgjidhur dot një krizë vetëm, sidomos të këtij niveli. Unë shfrytëzoj mundësinë t’u bëj thirrje ambasadorit të Shteteve të Bashkuara dhe të BE-së, të ndëryjë dhe të bëhen ata garant të marrëveshjeve historike për të ndaluar destabilizimin e Shqipërisë. Kjo për faktin sepse për një arsye themelore, 4 muaj protesta të zhvilluara në bulevard janë trajtuar nga mediat amerikane, britanike, gjermane, franceze, italiane si revolucion anti-Trump. SHBA i kanë një detyrim Shqipërisë të rivendosin paqen. Këto protesta kanë nisur ditën që zbriti Ivanka Trump në Shqipëri dhe për çështjen e Zvërnecit. E dyta, në këtë u përfshinë shumë faktorë ndërkombëtarë e europianë, përfshirë lindorë. Sot është kjo situata në Shqipëri për këto arsye. Duhet të shpërblehet Shqipëria, jo qeveria. SHBA dhe Brukseli duhet të dërgojnë një ndërmjetës ndërkombëtar dhe të organizojnë një tryezë”, përfundoi Spahiu.