Rrëzohet një avion luftarak francez, humb jetën piloti

Një avion luftarak i Forcave Ajrore Franceze është rrëzuar mbrëmjen e shtunës gjatë një misioni stërvitor në afërsi të qytetit Nancy. Aksidenti ndodhi rreth orës 23:00 dhe, sipas informacioneve të deritanishme, një prej dy ushtarakëve në bord ka humbur jetën, ndërsa fati i tjetrit mbetet ende i paqartë.

Avioni i tipit Mirage 2000-D kishte në bord një pilot dhe një oficer të specializuar për navigimin dhe menaxhimin e sistemeve luftarake.

Kryetari i komunës Pont-à-Mousson, Henri Lemoine, bëri të ditur se ekipet e kërkimit arritën të identifikojnë vendndodhjen e rrënojave përmes përdorimit të një droni.

Banorët e zonës treguan se kishin dëgjuar një shpërthim të fortë, të shoqëruar nga flakë të mëdha që ndriçuan qiellin gjatë natës.

Menjëherë pas ngjarjes, autoritetet mobilizuan forcat e policisë, zjarrfikësit dhe ekipet e emergjencës. Në operacion u përfshi edhe një helikopter, ndërsa kërkimet për anëtarin e dytë të ekipazhit vazhdojnë.

Paralelisht me operacionin e kërkim-shpëtim, autoritetet franceze kanë hapur hetime teknike dhe gjyqësore për të sqaruar rrethanat e rrëzimit.