LIVE- “Policia e politizuar, po ushtron dhunë”/ Pedagogu: Studentët nuk i besojnë më, pa dorëheqjen e Ramës nuk ka dialog!

Pedagogu Lush Susaj, i ftuar në studion e “News24”, ka komentuar protestën e studentëve dhe situatën në universitetet shqiptare. Ai deklaroi se pedagogët ndihen të shantazhuar dhe të frikësuar, ndërsa studentët shqiptarë përballen me padrejtësi. Susaj kritikoi gjithashtu veprimet e policisë gjatë protestave, duke pretenduar se ajo është e politizuar dhe po ushtron dhunë.

Sipas pedagogut, studentët e kanë dhënë tashmë përgjigjen e tyre dhe nuk besojnë më te mundësia e dialogut me kryeministrin Edi Rama. Ai akuzoi kryeministrin për manipulim të procesit zgjedhor dhe tha se studentët nuk do të mashtrohen apo përçahen më. Sipas tij, një dialog i mundshëm mund të shqyrtohet vetëm pas dorëheqjes së Ramës.

Më tej, Susaj i bëri thirrje kryeministrit të dëgjojë kërkesat dhe shqetësimet e studentëve, duke theksuar nevojën për ndryshime në mënyrën se si trajtohen problemet e tyre. Ai tha: “Pedagogët ndihen të shantazhuar, janë në hall. Studenti shqiptar është më i vjedhur. Stafet pedagogjike janë të frikësuar. Policia është e politizuar dhe po ushtron dhunë. Studentët kanë dhënë përgjigje, nuk ka dialog me Edi Ramën sepse e shuajti besimin përgjithmonë. Ky burrë që thotë se e ka votuar Shqipëria, i ka vjedhur votat. Studentët nuk do të mashtrohen më dhe as që do të përçahen. Pas dorëheqjen ndoshta do të mund të flitet për dialog. Kryeministri duhet të dëgjojë zërin e arsyes.”