Pedagogët shpallin bojkot pa afat: Nuk duam dialog, por dorëheqjen e Ramës!

Kryetari i Sindikatës së Pedagogëve, Skënder Kovaçi, ka njoftuar vendimin për bojkotin e procesit mësimor në të gjitha universitetet e Shqipërisë, në shenjë solidariteti me studentët që prej tetë ditësh protestojnë kundër qeverisë. Vendimi është marë unanimisht nga Kryesia e Sindikatës gjatë mbledhjes së zhvilluar më 20 tetor, në sheshin e protestës. Sipas tij, bojkoti nis sot dhe do të vijojë deri në një njoftim të dytë. Sindikata argumenton se ky vendim vjen si reagim ndaj mënyrës se si janë trajtuar kërkesat e studentëve, të cilët protestojnë për arsimin, shëndetësinë dhe llogaridhënien e institucioneve. Ndër kërkesat kryesore të Sindikatës janë ndalimi i dhunës ndaj studentëve dhe protestuesve, hetimi i përdorimit të forcës nga policia dhe vendosja përpara përgjegjësisë e personave që kanë ushtruar apo urdhëruar dhunën. Gjithashtu, kërkohej trajtim i ligjshëm dhe dinjitoz për të gjithë të rinjtë e ndaluar gjatë protestave. Kovaçi u bej thirrje edhe rektorëve të universiteteve që të respektojnë vendimin për bojkot dhe të mos ndërmarrin masa ndaj pedagogëve që zgjedhin t'u bashkohen protestave. Në përfundim, kreu i Sindikatës ritheksoi se pedagogët mbështesin kërkesat e studentëve dhe refuzojnë ofertën e kryeministrit Edi Rama për dialog. “Media në këtë protestë ka shkuar pushteti i parë, me prezencën në terren kanë mbrojtur qytetarët. Sindikata ka bërë një vendim për organizimin e bojkotit në mbështetje të studentëve, jemi pro studentëve në mbështetje të tyre dhe kundër dhunës. Kryesia në mbledhjen e 20 tetorit në sheshin e protestës vendosi njëzëri bojkotin e në të gjitha universitetet e Shqipërisë. Bojkoti nis sot dhe vijon deri në një njoftim të dytë. Arsyet: Studentët protestojnë për arsim, shëndetësinë, llogaridhënien etj. Përgjigja e marrë ka qenë heshtja dhe dhuna. Nuk mund të vijojmë mësimin kur studentët tanë dhunohen. Jemi në një menim me studentët. Të ndalohet dhuna ndaj studentëve dhe protestuesve. Hetim për përdorimin e forcës policore dhe vënien para përgjegjësisë të atyre që ushtruan dhe udhëhoqën dhunën. Trajtim i ligjshëm dhe dinjitoz i çdo të ri të ndaluar. Thirrje rektorëve të respektojnë vendimin dhe të mos ketë masa ndaj pedagogëve të cilët marrin pjesë në protestë. Deri sa themi të realizohen kërkesat e studentëve, nuk duam dialog, por dorëheqje”, thuhet në deklaratë.