Arrestohen dy autorët që i vendosën tritolin në makinën e kryetarit të njësisë administrative Shushicë
Dy shtetasët Shkëlqim Malaj dhe Ervin Skorovoti, të dy banues të Tiranës, u arrestuan për shkak se u gjetën të përfshirë në një rast të shkatërrimit të një automjeti me lëndë plasëse.
Policia e Vlorës ka zbardhur një rast të shkatërrimit të një automjeti me lëndë plasëse në fshatin Llakatund. Automjeti i shkatërruar i përkiste kryetarit të njësisë administrative Shushicë, një 29-vjeçar. Nga hetimet u bë i mundur identifikimi dhe arrestimi i dy shtetasve Shkëlqim Malaj dhe Ervin Skorovoti, të dy banues të Tiranës. Nga hetimet dyshohet se këta shtetas, në bashkëpunim me shtetas të tjerë ende të paidentifikuar, kanë vendosur një sasi lënde plasëse në automjetin e 29-vjeçarit. Nga shpërthimi u shkaktuan vetëm dëme materiale. Në bashkëpunim me Prokurorinë, vijojnë hetimet për identifikimin dhe kapjen e personave të tjerë të përfshirë në këtë ngjarje. Materialet procedurale iu referuan Prokurorisë së Vlorës për veprime të mëtejshme, për veprën penale “Shkatërrimi i pronës me eksploziv”, kryer në bashkëpunim.