Reklamat e krijuara me IA janë më pak efektive se ato të realizuara nga njerëzit

Reklamat e krijuara me inteligjencë artificiale mund të jenë më të shpejta dhe më të lira për të prodhuar, por rezultojnë më pak efektive në nxitjen e shitjeve dhe ndërtimin e besnikërisë ndaj markës. Ky është përfundimi i një studimi të publikuar nga Harvard Business Review, i cili tregon se konsumatorët shpesh nuk arrinë të dallojnë reklamat e krijuara nga IA, ndikimi i tyre tregtar është më i dobët.

Studimi, i realizuar në bashkëpunim me kompaninë kërkimore Ipsos, përfshiu 3 mijë konsumatorë amerikanë, të cilëve u shfaqën 20 reklama video të markave të njohura. Gjysma ishte krijuar nga njerëzit dhe gjysma tërësisht nga inteligjenca artificiale, duke ndjekur të njëjtit udhëzim krijues.

Rezultatet treguan se reklamat e gjeneruara nga IA kishin mesatarisht 14% më pak potencial për të nxitur shitjet afatshkurtra dhe 17% më pak ndikim në forcimin afatgjatë të markës. Sipas autorëve, rreziku kryesor për bizneset nuk qëndron te cilësia vizuale e reklamave. Përkundrazi, inteligjenca artificiale mund të prodhojë materiale që duken profesionale dhe kalojnë lehtësisht proceset e miratimit, por që nuk krijojnë të njëjtin lidhje me konsumatorin.

Një shembull është reklama e kompanisë Chewy, ku versioni i realizuar nga njerëzit tregonte plakjen e një qeni përmes një historie emocionale. Versioni i IA ruante idenë bazë, por nuk arrinte të përcilletë të njëjtin emocion.

Megjithatë, studimi evidenton se inteligjenca artificiale mund të jetë po aq efektive sa krijuesit njerëzorë në reklamat më të thjeshta, veçanërisht ato që prezantojnë drejtpërdrejt produktin dhe përfiteimet e tij. Reklamat e krijuara me IA për Febreze dhe Herbal Essences arritën rezultate të krahasueshme ose më të mira se versionet njerëzore për potencialin e shitjeve afatshkurtra.

Ndërkohë, IA shfaqi më shumë vështirësi në reklamat që kërkonin humor, emocione, origjinalitet dhe kuptim të kontekstit kulturor. Studimi paralajmëron gjithashtu se ulja e kostove të prodhimit nuk duhet të jetë treguesi kryesor i suksesit. Një reklamë më e lirë mund të rezultojë më e kushtueshme për kompaninë nëse gjeneron më pak shitje ose dobëson pozicionin e markës.

Një tjetër çështje është transparenca. Më shumë se gjysma e pjesëmarrësve deklaruan se përdorimi i IA në reklama nuk do të ndryshonte perceptimin e tyre për kompaninë, por një shumicë e madhe kërkonte që ky përdorim të bëhet i ditur.

Autorët rekomandojnë që bizneset ta përdorin inteligjencën artificiale për zhvillimin e ideve, përshtatjen e materialeve, krijimin e varianteve dhe demonstrimet e produkteve. Megjithatë, strategjia e markës, krijimtaria emocionale dhe fushatat e reklamuese duhet të mbeten nën drejtimin e njerëzve.

Përfundimi i studimit është se suksesi i inteligjencës artificiale në marketing nuk duhet matur nga numri i reklamave të prodhuara apo kursimet e realizuara, por nga ndikimi real të konsumatorëve dhe shitjet.