Pedagogët në bojkot, për të mbështetur studentët në protesta

Mëngjesin e sotëm, që përkon me ditën e nëntë të protestave studentore dhe me ditën e dytë të protestës së pedagogëve në mbështetje të tyre, qindra pedagogë dhe studentë marshuan nën shi drejt Kryeministrisë, duke kërkuar ndalimin e dhunës policore dhe plotësimin e kërkesave të protestuesve.

Sindikata e Punonjësve të Universiteteve të Shqipërisë njoftoi se ka vendosur bojkotin e mësimdhënies nga 21 tetori deri në një vendim tjetër, si dhe kërkoi një hetim të plotë dhe të pavarur për veprimet e policisë.

Sindikata e paraqiti bojkotin si një formë solidariteti dhe presioni, duke sqaruar se orët e humbura të studentëve do të kompensohen më vonë.

Për pedagogun Aleko Miho, mbështetja ndaj studentëve lidhet me një pakënaqësi më të hershme për mënyrën se si qeveria ka trajtuar universitetet.

“Kemi qenë gjithnjë të ndjeshëm ndaj qasjes së qeverisë ndaj universitetit. Duke filluar që nga trajtimi me rroga, me hapësira, probleme me ndërtesën atje në fakultet, me Kopshtin Botanik, me Muzeun e Shkencave. Kjo që ndodh tani është një përkrahje ndaj studentëve që duhet të ndodhë, domethënë nuk mund të rrijë profesorati larg asaj që po ndodh,” u shpreh Miho.

Miho i sheh problemet në një kontekst më të gjerë se përplasjet e ditëve të fundit. Sipas tij, problemet e arsimit lidhen edhe me mënyrën se si funksionojnë institucionet publike, me pabarazitë në akses dhe me largimin e të rinjve të kualifikuar nga vendi.

“Arsimi është klientelist në mënyrën se si është organizuar. Shëndetësia është po ashtu, kush ka lekë mbaron punë, kush nuk ka nuk mbaron punë, klientelizmi. Po kështu është dhe arsimi, kush ka lekë shkon këtu, kush s’ka shkon atje, ose më të mirët na ikin jashtë,” tha ai, duke kritikuar gjithashtu modelin e zhvillimit të vendit dhe duke përmendur korrupsionin, urbanizimin dhe zonat e mbrojtura.

Pedagogu dhe aktivisti Jani Maka e përshkroi protestën si një proces që është zgjeruar gradualisht, duke përfshirë grupe të ndryshme shoqërore. Ai tha se ka qenë pjesë e protestave që prej fundit të majit dhe se mobilizimi aktual nuk mund të kuptohet vetëm si një revoltë studentore.

“Për organizimin këtu, besoj gjithë kjo ka qenë një proces shumë i gjatë. Nisi si një protestë dhe besoj është shndërruar në një lëvizje edhe në prag të një, të thuash, të një revolte, e cila mendoj që e tejkalon thjesht një revoltë studentore, por është një revoltë e gjerë e mbarë shoqërisë,” u shpreh Maka.

Ai tha se në protestë janë përfshirë studentë, gjimnazistë, pedagogë, qytetarë nga shtresat e mesme, sipërmarrës të vegjël dhe pensionistë. Kjo pjesëmarrje, sipas tij, tregon se pakënaqësia është më e gjerë se kërkesat e një grupi të vetëm.

“Ajo që ka qenë revoltuese është dhuna që është ushtruar, dhuna është shumë e egër nga policia që është ushtruar ndaj studentëve në protestën e tyre paqësore,” tha Maka, duke veçuar dhunën policore si një nga faktorët që ka shtuar zemërimin e protestuesve.

Përplasjet mes policisë dhe protestuesve kanë shoqëruar ditët e fundit të mobilizimit, ndërsa kërkesa për hetimin e veprimeve të efektivëve është bërë pjesë e thirrjeve të protestuesve dhe e qëndrimit të pedagogëve.

Para se protestuesit të mbërrinin në Kryeministri, për të dytën herë ishin vendosur karrige me fletë ku shkruhej “Dialog”. Rama u shpreh edhe një herë mëngjesin e sotëm se ishte i gatshëm për dialog, por përjashtoi nga kjo mundësi personat që ushtrojnë dhunë dhe nuk distancohen prej saj.

Studentët e refuzuan sërish ftesën.