Europa nën kërcënimin e destabilizimit: Luftë hibride dhe dhunë në rrjetet sociale
Protestat në Itali, Francë dhe Portugalë kanë shkaktuar shqetësim në Evropë për destabilizimin dhe luftën hibride, duke përfshirë përhapjen e mesazheve te rrjetet sociale dhe manipulimin e informacionit.
Europa është nën kërcënimin e destabilizimit, duke filluar nga protestat në Itali, Francë dhe Portugalë. Protestat që filluan me kërkesa sociale, por përfunduan në përplasje me policinë, dhunë dhe shkatërrime të pronave private dhe publike. Në Itali, shërbimet e inteligjencës po analizojnë mënyrën se si u organizuan dhe u përhapën thirrjet për protestat e dhunshme në Milano, Torino dhe Bolonjë. Hetimet po shqyrtojnë rolin e rrjeteve sociale, algoritmeve dhe llogarive automatike në përhapjen e mesazheve te të rinjtë.
Në Francë, situata mbetet jashtëzakonisht e tensionuar pas tubimeve masive të 17 tetorit, të cilat mblodhën rreth 550,000 pjesëmarrës në mbarë vendin dhe degraduan në trazira e përleshje të dhunshme. Deri më tani, në të gjithë Francën janë arrestuar rreth 2,500 persona. Për të vënë situatën nën kontroll, qeveria ka vendosur shtetrrethime lokale gjatë natës në zonat më të prekura nga demonstratat.
Në Portugali, përplasjet janë zhvendosur te kriza e strehimit. Policia ndërhyri në kryeqytet për të çmontuar kampet me tenda të ngritura nga demonstruesit, të cilët kërkojnë masa kundër rritjes së kostove të banimit. Protestuesit formuan një zinxhir njerëzor, përpara se situata të përshkallëzohej në përplasje me forcat e rendit. Vetëm mbrëmjen e së martës u arrestuan 55 persona, ndërsa policia konfiskoi 228 struktura kampingu.
Në epokën e luftës hibride, destabilizimi nuk kërkon domosdoshmërisht tanke apo ndërhyrje ushtarake. Ai ushqehet edhe nga manipulimi i informacionit, polarizimi shoqëror dhe amplifikimi i pakënaqësive.