Deputeti i PD: Policia përdor dhunë makabre ndaj studentëve, urdhrat vijnë nga Rama dhe Balluku

Anëtari i Kryesisë së Partisë Demokratike dhe deputeti Klevis Balliu ka lëshuar akuza të drejtpërdrejta ndaj drejtuesve më të lartë të qeverisë, duke e cilësuar veprimtarinë e Policisë së Shtetit gjatë ditëve të protestës si një ushtrim të dhunës makabre në shërbim të pushtetit politik.

Përmes një deklarate publike, Balliu theksoi se përdorimi i armëve joletale dhe shkopinjve të gomës po vendos në rrezik jetën e të rinjve që protestojnë në rrugët e kryeqytetit.

Përfaqësuesi opozitar u ndal te rastet konkrete të ushtrimit të forcës supressive në rrugë dhe në mjediset e paraburgimit, duke paralajmëruar për pasoja të rënda shëndetësore për qytetarët:

“Të rinj dhe të reja janë goditur barbarisht në rrugët e vendit me shkopinj gome dhe plumba gome, duke vënë në rrezik serioz jetën dhe shëndetin e tyre. Rasti i raportuar ku një qytetar u plagos në zonën abdominale nga një plumb gome është një kambanë alarmi për përmasat e rrezikut që sjell përdorimi i dhunës nga uniformat e shtetit.”

Balliu denoncoi gjithashtu keqtrajtimet e raportuara brenda ambienteve të policisë, si dhe shoqërimet pa bazë ligjore:

“Po aq të rënda janë dëshmitë për dhunë ndaj qytetarëve brenda komisariateve. Është e papranueshme që qytetarët të ndalohen arbitrarisht në rrugë, pa një bazë të qartë ligjore. Rasti i dy të rinjve të ndaluar në zonën e Tajvanit ngre pikëpyetje serioze për ligjshmërinë e veprimeve policore, veçanërisht pas intervistës që ata kishin dhënë vetëm dy orë më parë.”

Deputeti i opozitës nënvizoi se efektivët e policisë nuk mund të fshihen pas eprorëve të tyre, por kërkoi hetime të plota për zinxhirin e komandimit që ka dhënë urdhrat për goditjen e turmës:

“Kush i jep këto urdhra dhe kush mban përgjegjësi për dhunën? Përgjegjësia politike nuk mund të fshihet pas maskave dhe uniformave. Edi Rama, Belinda Balluku dhe Taulant Balla duhet të japin përgjigje publike për qëndrimet e tyre. Urdhrat për këto veprime vijnë nga nivelet më të larta të pushtetit, askush nuk mund të pretendojë se nuk mban përgjegjësi.”

Ai shtoi se imuniteti institucional nuk mund të mbrojë shkelësit e ligjit: “Çdo efektiv që shkel ligjin duhet të identifikohet dhe të mbajë përgjegjësi individuale. Uniforma nuk është imunitet për dhunën dhe urdhrat nuk janë justifikim për veprime të paligjshme. Është turp dhe përmbysje e çdo standardi të drejtësisë që studentët që protestojnë të përfundojnë pas hekurave, ndërsa Edi Rama, Belinda Balluku dhe Taulant Balla janë ende të lirë.”

Në përmbyllje të reagimit të tij, Balliu kërkoi ndërhyrjen e menjëhershme të organeve të drejtësisë për hetimin e pavarur të çdo incidenti të regjistruar gjatë ditëve të demonstratave:

“Ne kërkojmë ndalimin e menjëhershëm të dhunës ndaj protestuesve, identifikimin e efektivëve përgjegjës, hetimin e pavarur të çdo rasti të dhunës dhe lirimin e çdo personi të ndaluar në mënyrë të paligjshme. Studentët nuk janë armiq të shtetit. Armiku i shtetit të së drejtës është çdo pushtet që përdor institucionet publike për të shtypur qytetarët dhe për t’iu shmangur llogaridhënies — ky armik ka emër dhe quhet Edi Rama.”