Arlind Qori: Rama ka humbur arsyen dhe legjitimitetin, protestuesit nuk kanë asgjë për t’u humbur nën qeverisjen e tij
Arlind Qori, kryetari i Lëvizjes Bashkë, ka akuzuar kryeministrin Edi Rama se ka humbur arsyen dhe legjitimitetin për të qeverisur Shqipërinë. Ai ka deklaruar se kërcënimet ndaj të rinjve nuk funksionojnë, pasi ata nuk kanë asgjë për t’u humbur nën qeverisjen e Ramës.
Kreu i Lëvizjes Bashkë, Arlind Qori, ka akuzuar kryeministrin Edi Rama se ka humbur arsyen dhe legjitimitetin për të qeverisur Shqipërinë. Nga sheshi i protestuesve, Qori ka deklaruar se kërcënimet ndaj të rinjve nuk funksionojnë, pasi ata nuk kanë asgjë për t’u humbur nën qeverisjen e Ramës.
Gjatë fjalës së tij, Qori ka ironizuar deklaratat e kryeministrit lidhur me ndalimin e udhëtimit me tren për protestuesit, duke theksuar se një paralajmërim i tillë bëhet në një vend që nuk ka një sistem funksional hekurudhor.
“E morët vesh mendurinë e fundit të Edi Ramës? Në një vend ku nuk ka trenë, ai do t’u ndalë protestuesve, të rinjve në protestë, që nesër të hipin në tren. Edi Rama e ka humbur arsyen, Edi Rama e ka humbur legjitimitetin për të qeverisur, Edi Rama e ka humbur edhe kapacitetin për të qeverisur”, u shpreh Qori për “News 24”.
Ai ka theksuar se të rinjtë janë ngritur në protestë për të kërkuar një të ardhme më të mirë, duke pretenduar se qeverisja e Ramës u ka mohuar mundësitë për të ndërtuar jetën në Shqipëri.
Sipas Qorit, as përpjekjet e pretenduara të kryeministrit për të nxitur prindërit që të pengojnë fëmijët e tyre të marrin pjesë në protesta nuk kanë dhënë rezultat, pasi familjarët mbështesin të rinjtë.
“Ai nuk i kërcënion dot të rinjtë, sepse të rinjtë nuk kanë as sotmë, as të ardhme në Shqipëri nën qeverisjen e Edi Ramës”, deklaroi ai.
Kreu i Lëvizjes Bashkë ka vijuar me akuza ndaj qeverisë, duke pretenduar se korrupsioni, oligarkia dhe krimi i organizuar kanë rënë në jetën e shqiptarëve dhe kanë shtuar pakënaqësinë qytetare.
Në përfundim, Qori u ka bërë thirrje qytetarëve të gjithë në të gjithë vendin t’i bashkohen protestuesve, duke deklaruar se, sipas tij, sistemi aktual politik po i afrohet fundit.
“Prandaj unë i bëj thirrje të gjithëve, çdo qytetari të Republikës së Shqipërisë, të bashkohen në këto proteste, sepse vërtet Edi Rama dhe sistemi i vjetër politik dhe oligarkik po i vjen fundi”, përfundoi Qori.